رێكخەری گشتیی بزووتنەوەی گۆڕان جەخت لە كۆتایی هێنان بە رۆڵی حزبەکان لە بازاڕ دەکاتەوە

بەپێی هەوای کوردپرێس، کلیمەنس زێمتنەر، کۆنسوڵی گشتی ئەڵمانیا لە هەرێمی کوردستان سەردانی مەکۆی سەرەکیی بزووتنەوەی گۆڕانی کرد لە شاری سلێمانی و لەلایەن عومەر سەید عەلی رێکخەری گشتی و رێکخەر و ئەندامانی ژووری پەیوەندییە دیپلۆماسییەکانی بزووتنەوەی گۆڕانەوە پێشوازیی لێکرا.

بەپێی راگەیەندراوێكی بزووتنەوەی گۆڕان، لەبارەی ناوەڕۆکی کۆبوونەوەکەوە، شوناس شێرکۆ رایگەیاند: گفتوگۆ کرا سەبارەت بە پەیوەندییەکانی نێوان بزووتنەوەی گۆڕان و لایەنە سیاسیەکانی هەرێمی کوردستان و بارودۆخی عێراق و هەڵبژاردنی ئەنجومەنی نوێنەرانی عێراق و بزووتنەوەی گۆڕان و کۆنسوڵی گشتی ئەڵمانیا هاوڕابوون لەسەر ئەوەی پێویستە هەڵبژاردنەکە بەشێوەیێکی پاک و بێگەرد و دوور لە ساختەکاری بەڕێوە بچێت.

وتیشی: لەبارەی دۆخی هەرێمی کوردستانەوە، رێکخەری گشتیی بزووتنەوەی گۆڕان دووپاتی کردەوە کە پێویستە شەفافیەتی زیاتر لە هەموو بوارەکان لە هەرێمی کوردستان پەیڕەو و بەرجەستە بکرێت و داهاتی نەوتی و نانەوتی بۆ پەرلەمان و خەڵکی کوردستان ڕوون بکرێتەوە، لەگەڵ ئەوەشدا بزووتنەوەی گۆڕان جەخت لە خێراکردنی هەنگاوەکانی چاکسازی گشتگیر و هەمەلایەن دەکاتەوە لە سەرجەم سێکتەرەکان و بە گرنگیەوە دەڕوانینە ئەوەی رۆڵی حیزب لە بازاڕ و قۆرخ کردنیدا کۆتایی پێبهێنرێت.

کۆدی هەواڵنێر: 60113