مێراڵ ئاکشەنەر گەڕایەوە سەر مێزی هاوپەیمانیی شەش قۆڵیی ئۆپۆزیسیۆنی تورکیا

بەپێی هەواڵی کوردپرێس، کۆبوونەوەی هاوپەیمانیی میللەت، دوای نیوەڕۆی ڕۆژی دووشەممە 6-3-2023 لە بارەگای سەرەکیی پارتی سەعادەت لە ئەنقەرە دەستیپێکرد. مێرال ئاکشەنەر، سەرۆکی گشتیی ئیی پارتی کە رۆژی هەینی 3-3-2023 کشانەوەی پارتەکەی لە ریزی شەش پارتەکە راگەیاندبوو، بەشداریی لەو کۆبوونەوەدا کرد.

ئەم بەشداری کردنە لەکاتێکدایە کە ئەکرەم ئیمامئۆغڵو، سەرۆکی گەورەشارەوانیی ئیستەنبووڵ و مەنسور یاڤاش، سەرۆکی گەورەشارەوانیی ئەنقەرە کە هەردووکیان لە پشکی جەهەپەن، لەگەڵ ئاکشەنەر کۆبوونەوە.

کۆبوونەوەی هاوپەیمانیی میللەت زووتر پلانداڕێژیی بۆ کرابوو و ئیی پارتی راگەیاندبوو کە ئاکشەنەر بەشداری لەو کۆبوونەوەیەدا ناکات. سەردان و کۆبوونەوەی ئیمامئۆغڵو و یاڤاش لەگەڵ ئاکشەنەر کاتی کۆبوونەوەکەی هاوپەیمانیی میللەتی لە کاژێر 14:00ـەوە بۆ کاژێر 16:00 دواخست. سەرەنجام ئاکشەنەر رازی بوو بەوەی بەشداری لە کۆبوونەوەکەدا بکات.