مەسعوود بارزانی لەگەڵ شاندێکی ئەمریکی کۆبوویەوە
بەشی عێراق و هەرێمی کوردستان- ئه‌مڕۆ چوارشەم لە سەلاحەدین مەسعوود بارزانی پێشوازیی لە شاندێکی وەزارەتی دەرەوەی ئەمریکا کرد.
بەپێی هەواڵی کوردپرێس، شاندە ئەمریکییەکە پێکھاتبوون لە جینیفەر گاڤیتۆ جێگری یاریدەدەری وەزیری دەرەوەی ئەمریکا و ماتیو تولەر باڵیۆزی ئەمریکا لە عێراق و ڕۆبێرت پالادینۆ کونسوڵی گشتی ئەمریکا لە ھەولێر و ھەروەھا ژمارەیەک ڕاوێژکاری سەربازی و سیاسی.
لە دیدارەکەدا بارودۆخی عێراق و دوا پێشھاتە سیاسییەکان و پڕۆسەی سیاسی و ڕێگەچارەکان بۆ تێپەڕاندنی تەحەدیات و پاراستنی سەقامگیری تاوتوێ کران.
ھەر لەو کۆبوونەوەیە جەخت لەسەر ھەماھەنگی و کاری ھاوبەشی ھێزی پێشمەرگەی کوردستان و ھێزەکانی عێراق لە شەڕی تیرۆر کرایەوە.
لە بەشێکی تری دیدارەکەدا شاندی میوان ئەوەیان دووپاتکردەوە کە ئەمریکا بایەخێکی گرینگ بە پێگە و سەقامگیری ھەرێمی کوردستان دەدات.
بارودۆخی سووریا و پێشھاتە مەیدانییەکانی ڕووبەڕووبوونەوەی تیرۆر لەو وڵاتە تەوەری تری ئەو کۆبوونەوەیە بوون.
بۆچوونی بەکارهێنەران