وردەکاریی هێنانی دەرمانی ساختەی شێرپەنجە بۆ هەرێم لەلایەن کۆمپانیایێکەوە

کوردپرێس: دەقی سکاڵاکەی عەلی حەمەساڵح و ئەبوبەکر هەڵەدنی لەسەر ئەو کۆمپانیایە حەوت ساڵە دەرمانی ساختەی شێرپەنجە هاوردە دەکات:

بەرێز/ داواکاری گشتی لە هەرێمی کوردستان

بابەت: جووڵاندنی سکاڵای یاسایی

سڵاو و رێز...

ماوەی حەوت ساڵە، کۆمپانیای "دلێر فارما" کە کۆمپانیایەکی خوماڵی دەرمانی ساختەکراوی شێرپەنجە بۆ نەخۆشخانەکانی شێرپەنجە دابین دەکات.

ئەم کۆمپانیایە، دەرمانی کۆمپانیا جیهانیەکانی ساختەکردووە و هەموو بەڵگەنامەکانی ئەو کۆمپانیانەی ساختەکردووە، یەکێک لەو کۆمپانیانە (Novartis) سویسریە، کە بەنووسراوی فەرمی دەڵێ‌: هەموو بەڵگەنامەکانی لەلایەن ئەم کۆمپانیایەوە ساختەکراوە.

بەبڕیاری حکوومەتی هەرێم، کاتێک کۆمپانیایەک دەرمانی نەخۆشی شێرپەنجە دەهێنێت داوای ناسنامەی دەرمان(COA) لێدەکرێت بۆ ئەوەی بزاندرێت ئەو دەرمانە سەلامەت و باوەڕپێکراو چارەسەرە،بەڵام ئەم کۆمپانیا دەرمانی ساختەی هێناوەو بەڵگەنامەی کۆمپانیا جیهانیەکانی هێناوەو دوای حەوت ساڵ لەم کارە پێی وتراوە ئەمە ساختەیە.

هەرچەندە لە3/12/2020ەوە کوالێتی کۆنتڕۆ داوای لێکۆڵینەوەی لەکاروباری ئەم کۆمپانیا کردووە، بەڵام تائێستا ئەم کۆمپانیا سرا نەدراوە.

لای خۆیەوە وەزارەتی تەندروستیی هەرێمی کوردستان لەمبارەوە ڕاگەیێمدراوێکی بڵاو کردۆتەوە:

ڕوونکردنەوەیەک بۆ ڕای گشتی …

لە تۆڕە كۆمەڵایەتیەكان بابەتی دەرمانێكی ساختە لەلایەن پەرلەمانتارێكی بەڕێز بڵاوكرایەوە کە ڕەوانەی داواکاری گشتی کردووە لەلایەن ئەو بەڕێزەوە.

ئێمە لە وەزارەتی تەندروستی حكومەتی هەرێمی كوردستان بۆ ڕای گشتی و هاوڵاتیانی خۆشەویست ڕووندەكەینەوە کە ئەم دۆسیەی دەرمانی ساختەیە هەر بە چاوساغی و چاودێری كۆنتڕۆڵی جۆریی دەرمان و پێداویستیی پزیشكی(KMCA) وەزارەتمان ماوەی نزیکەی ساڵێک بەر لە ئێستا ئاشکرا کرا و دەستبەجێ ڕێکارەکانی یاسایی و دەستبەسەرداگرتن و ڕاگرتنی کۆمپانیا و لێكۆڵینەوە بەچاودێری دادوەری داواكاری گشتی ئەنجامدراوە و دۆسیەکە تەواو ساغ بوویتەوە کە دەرمانێکی ناڕەسەن و ساختەیە و ڕەوانەی دادگا کراوە.

بۆیە دووپاتی دەکەینەوە ئەم ڕێکارە نوێ نیە بەڵکو زووتر جێبەجێ کراوە، ئومێدەواربووین ئەو پەرلەمانتارە بەڕێزە و هەر کەس و لایەنێکی دیکە پێش نووسین و قسەکردنی لە سۆشیاڵ میدیا بانگەشەی ئاشكراكردنی بكات بەدوای ڕاستی و دروستی ڕێکارەکان بووایە کە ئایا لە وەزارەتی تەندروشتی هیچ ئیجرائاتێک کراوە یان نا نەوەک بێ گەڕانەوە بۆ پرسیاركردن بکرێتە بابەتی میدیایی.

هاوڵاتیانی خۆشەویست دڵنیا دەكەینەوە کە ئەم كۆمپانیایە و چەند كۆمپانیایەكی دیکە كە كاری ساختەکردنی دەرمانی ئەنجامدابێت ڕێكاری یاسای گیراوەتە بەر و سزای ڕاگرتنی کار و هەڵوەشاندنەوەی کۆمپانیا و ڕەوانەکردنی دادگا كراوە بەتایبەتی لەماوەی دوو ساڵی ڕابردوو دوای پێداچوونەوە و بەڕێوەچوونی قۆناغەکانی چاکسازیکردن لە جۆر و کوالیتی دەرمان و گەڕان و پشكنین و بەدواداچوونی یەكێک لە ئەركە پیویستیەکانی ڕۆژانەی تیمەکان بووە بێ ئەوەی بکرێتە بابەتی میدیایی و بانگەشەکردنچەندین کۆمپانیا و دامەزراوەی پزیشکی ڕێکاری یاسایی بەرامبەر وەرگیراوە.