مەسعوود بارزانی لەگەڵ ئەمینداری گشتیی کۆمکاری عەرەبی کۆ بوویەوە
بەشی عێراق و هەرێمی کوردستان- لە دیداری نێوان مەسعوود بارزانی و ئەمینداری گشتیی کۆمکاری عەرەبی و شاندێکی یاوەریدا هەڕەشە و مەترسییەکانی تیرۆر و هزری توندڕۆیی لەسەر عێراق و وڵاتانی ناوچەکەش تاووتوێ كران.
کوردپرێس:
ڕۆژی یەکشەممە 11ـی نیسانی 2021 لە سەڵاحەددین مەسعوود بارزانی سەرۆکی پارتی دیموکراتی کوردستانی عێراق پێشوازیی لە ئەحمەد ئەبولغەیت ئەمینداری گشتیی کۆمکاری عەرەبی و شاندێکی یاوەری کرد.
لە دیدارەکەدا ئەمینداری گشتیی کۆمکاری عەرەبی ئامانجی سەردانەکەی بۆ عێراق و دیداری لەگەڵ سەرۆکایەتەکانی عێراق بۆ مەسعوود بارزانی خستە ڕوو. هیوای ئەوەشی خواست کە عێراق بتوانێ دوور لە دەستوەردانی دەرەکی بەرەو سەقامگیری هەنگاو بنێت و جەختیشی لە گرنگیی پەیوەندیی نێوان وڵاتانی عەرەبی و عێراق کردەوە.
هەر لەو دیدارەدا هەر دوولا بیروڕایان لەبارەی تەحەددیاتی بەردەم پڕۆسەی سیاسیی عێراق و پێکەوەژیان و پێویستیی چەسپاندنی بنەماکانی شەراکەت لە عێراق ئاڵوگۆڕ کرد.
هەڕەشە و مەترسییەکانی تیرۆر و هزری توندڕۆیی لەسەر عێراق و وڵاتانی ناوچەکە تەوەرێکی تری ئەو دیدارە بوو.
بۆچوونی بەکارهێنەران