جەنگی: جێبەجێ کردنی لامەرکەزی مەرجی مانەوەمانە لە حکوومەتدا

کوردپرێس:

ڕۆژی دووشەممە، 15ی ئازاری 2021 لاهوور جەنگی هاوسەرۆکی یەکێتیی نیشتیمانیی کوردستان رایگەیاند، "رێککەوتنی هەرێم و بەغدا گرنگە و رێککەوتنەکەمان تەنیا بۆ بودجە نابێت، بەڵکو چەندین کێشەی ترمان هەیە لەگەڵ بەغدادا."

ئەوەشی خستەڕوو، "ئێمە لەگەڵ بەغدا کێشەی کەرکوک و ناوچە دابڕێندراوەکانمان هەیە، کە ئەویش لە رێگەی پەنابردنە بەر دەستور و خەباتی سیاسی و پەرلەمانییەوە چارەسەر دەبێت."

لەسەر مەلەفی نەوتی هەرێمیش هاوسەرۆکی یەکێتیی دەڵێت، "ئەو مەلەفە شەفافییەتی تێدا نییە و پێویستە چاکسازییەکی تەواوی تێدابکرێت و ئێمە لەگەڵ ئەوەداین ئەو مەلەفە بە بەغداوە ببەسترێتەوە."

لەبارەی لامەرکەزیشەوە ئاماژەی بەوەکردووە، "ئەو پرسە پەیوەندیی راستەوخۆی بە هەرێمی کوردستانەوە هەیە و دەمانەوێت لە هەموو پارێزگاکانی هەرێم جێبەجێ بکرێت نەک تەنیا لە پارێزگای سلێمانی."

راشیگەیاندووە، "لامەرکەزی قەوارەی هەرێم بەهێز دەکات و یەکسانی و هاوسەنگی لە نێوان سەرجەم پارێزگاکان دروستدەکات و لەو رێگەیەشەوە خزمەتگوزاریی زیاتر و باشتر پێشکەش بە هاوڵاتییانی هەرێم دەکرێت."

لاهور جەنگی جەختیش دەکاتەوە، "سورین لەسەر جێبەجێکردنی لامەرکەزی و ئەوە مەرجی مانەوەمانە لەم کابینەیەدا."

ئەم وتانەی هاوسەرۆکی یەکێتیی لەکاتێکدایە، ئەو حزبە بە فەرمى و کرداریى لە ناو حکومەتدایە و بەشدارە لە تەواوى بریارەکانى ناو حکومەتى هەرێم و خاوەنى دەسەڵاتە هاوکات، پشکیان هەیە لە پارە و داهاتى نەوت و وەریدەگرن.

تەنانەت سەرۆکی شاندى دانوستانکاری هەرێمیش بۆ بەغدا لە حزبەکەی هاوسەرۆکی یەکێتییە، کە جار جار لە میدیاکانەوە راگەیەنراوى جیاواز دەردەکات، لەکاتێکدا بە فەرمى لە ناو حکومەتدایە.