شه‌ڕی تورکیا و په‌که‌که‌ 200 خێزانی لە ناوچە سنوورییەکانی هەرێمی کوردستان ئاواره‌ کردووه‌

بەپێی هەواڵی کوردپرێس، ئیسماعیل محەمەد قائیمقامی ئامێدی بە پێگەی "مەعلومە"ی راگەیاندووە، لەو چەند رۆژەی دواییدا زیاتر لە 200 خێزان خانووەکانی خۆیان جێھشتووە و ئاوارە بوونە بەھۆی بەردەوامی بۆردوومانەکانی تورکیا بۆ ناوچەکانی باتیفا و کانی ماسی و گوندەکانی ئامێدی.

ئیسماعیل محەمەد گوتی: "ئەو خێزانانە پەنایان بردووەتە بەر شارەکان. ئەمەش بووەتە مایەی زیانێکی زۆری ئابووری، چوونکە زۆربەی ئەو خێزانانە جووتیارن و کێڵگەی پەلەوەر و کێڵگەی گەورە و باخیان ھەیە و بۆ بژێوی ژیانی خێزانه‌کانیان پشتیان پێدەبەستن".

ئاماژەشی کرد، چەند مانگێکە شەڕی نێوان چەکدارانی پارتی کرێکارانی کوردستان "پەکەکە" و ھێزەکانی تورکیا کاریگەری لە سەر قەزاکە کردووە، تەنانەت کاریگەری لە سەر کەرتی گەشتوگوزاریش کردووە، لەبەر ئەوەی زۆربەی ھاووڵاتیان دوو دڵن و ترسیان ھەیە لە چەند بارەبوونەوەی بۆردوومانە ھەڕەمەکییەکان، کە ھاووڵاتییانی بێگوناە دەبنە قوربانی.

کۆدی هەواڵنێر: 60113