پێویستە پێشمەرگە لە هێزێکی حیزبی و شەخسیەوە ببێتە هێزێکی نیشتمانی و دەستووری
بەپێی هەواڵی کوردپرێس، شاسوار عەبدولواحید سەرۆکی جووڵانەوەی نەوەی نوێ ئاماژەی بەوە کرد، ناوی پێشمەرگە و هێزەکانی پێشمەرگە ناو و هێزێکی بە تەواوی دەستووری و یاسایین و هیچ ناکۆکییەکی لەسەر نییە، بەڵام لە واقیعدا لە هەرێمی کوردستان هێزی میلیشیایی و حیزبی و شەخسی بوونیان هەیە.
ئەوەشی خستەڕوو، بۆ چارەسەرکردنی ئەم دۆخە پێویستە ئەو هێزانە یان بە تەواوی چەک بکرێن، یانیش لەناو دامەزراوە نیشتمانی و دەستوورییەکانی هەرێمی کوردستاندا یەکبخرێن و بەتەواوی تێکەڵ بکرێنەوە.
شاسوار عەبدولواحید باسی لە هەوڵەکانی وڵاتانی هاوپەیمانان کرد بە سەرکردایەتی ئەمریکا و رایگەیاند، لە ماوەی ۱۰ ساڵی رابردوودا ملیاران دۆلاریان خەرج کردووە بە مەبەستی یەکخستنی تەنها هەشت لیوای پێشمەرگە، بەڵام تاوەکو ئەمڕۆ ئەو ئامانجە نەپێکراوە و سەرکەوتوو نەبوون.
لە کۆتاییدا ئاماژەی بەوەش کرد، ئەو لیوایانە لەگەڵ هێزە چەکدارەکانی دیکەدا، هێشتا لە کردار و رەفتاردا فەرمان لە کەسایەتی و حیزبەکان وەردەگرن، نەک لە دامەزراوە فەرمی و دەستوورییەکانی هەرێمی کوردستان.
بۆچوونی بەکارهێنەران