لە پەراوێزی ڕێوڕەسمی سوێندخواردنی سەرۆکی هەرێم:
مەسروور بارزانی و وه‌زیری ده‌ره‌وه‌ی تورکیا کۆ بوونەوە
بەشی تورکیا- ئەمڕۆ دووشەممە ١٠-٦-٢٠١٩ مەسروور بارزانی راوێژکاری ئەنجومەنی ئاسایشی هەرێمی کوردستان، پێشوازی لە مەولوود چاوشئۆغلۆ وەزیری دەرەوەی تورکیا و شاندی یاوەری کرد.
کوردپرێس: لەم دیدارەدا پەرەپێدانی پەیوەندییەکانی نێوان هەولێر و ئەنقەرە و دوا پەرەسەندنەکانی ناوچەکە تاوتوێ کران و جەخت لە پاراستنی بەرژەوەندی ھاوبەش و سەقامگیری و ئاسایش و پێکەوەژیانی ئاشتیانەی نێوان گەلانی ناوچەکەدا کرایەوە.
وەزیری دەرەوەی تورکیا، وێڕای بەئاوات خواستنی سەرکەوتن بۆ مەسروور بارزانی لە سەرۆکایەتی کردنی کابینەی داھاتووی حکوومەتی ھەرێمی کوردستاندا، فراوان کردنی ئاسۆی ھاریکاری و پەرەپێدانی پەیوەندی دوو قۆڵی لەنێوان هەردوولا لەگشت بوارەکان بەپێویست زانی.
لە بەرامبەردا مەسروور بارزانی، وێڕای ئاماژەدان بەگرینگی بوونی بەرژەوەندی ھاوبەش لەنێوان ھەرێمی کوردستان و تورکیا، خواستی ھەرێمی کوردستانی بۆ پەرەپێدانی پەیوەندییەکان لە بوارە جۆراوجۆرەکان دەربڕی.
کۆدی هەواڵنێر: 60113
بۆچوونی بەکارهێنەران