وتەبێژی هێزەکانی سووریای دیموکرات: 5 هەزار داعشی لە باغۆز خۆیان ڕادەست کردووە
مستەفا بالی لێپرسراوی ڕاگەیاندنی هێزەکانی سووریای دیموکرات لە بارەی دوایین ڕەوشی شەڕی دژ بە تیرۆر لە باغۆز بە هەواڵنێری کوردپرێسی وتووە: "لە نێو داعشییەکاندا خەڵکی مەدەنی هەن کە زۆرینەیان بنەماڵەی چەکدارانی داعشن و هەر ئەوەش بۆتە هۆکار بۆ خاوبوونەوەی ئوپەراسیۆنەکانی هێزی سووریای دیموکرات بەڵام بەوەشەوە تا ئەم کاتە زیاتر لە 5 هەزار چەکداری داعش خۆیان ڕادەستی هێزکانی ئێمە کردووە."
ناوبراو ئاشکراشی کرد: "ڕۆژی ڕابردوو چوار خۆکوژی داعش بەنیاز بوون لە هێزەکانی هەسەدە نزیک ببنەوە بەڵام لە لایەن هێزەکانی ئێمەوە کرانە ئامانج و تەقێنرانەوە."
مستەفا بالی نیگەرانیی لەبارەی زیادبوونی ژمارەی داعشە دیلەکان دەربڕی و لەو بارەیەوە بە هەواڵنێری کوردپرێسی وت: ڕۆژ لە دوای ڕۆژ ژمارەی دیلەکان زیاتر دەبێت و لە سەرەتای دەستپێکردنی ئوپەراسیۆنی باغۆزەوە زیاتر لە 5 هەزار چەکداری داعش خۆیان ڕادەستی هێزەکانی ئێمە کردووە. ئێمە وای بۆ دەچین کە هێشتا ژمارەیێکی زۆر لە تیرۆریستانی داعش لەگەڵ ژن و منداڵەکانیان لە تونێلەکاندا خۆیان شاردۆتەوە. ئێمە نیگەرانین لەوەی سڤیلەکان بکوژرێن بۆیە ئوپەراسیۆنی پاککردنەوەی دوایین خاڵەکانی باغۆز لە تیرۆریستان بە خاوی دەچێتە پێشەوە.
بۆچوونی بەکارهێنەران