دوو سەرکردەی باڵای پەکەکە لە کوردستانی سووریا گیانیان لەدەست داوە
بەپێی هەواڵی کوردپرێس، لە ڕاگەیەندراوی کۆمیتەی شەهیدانی پەکەکەدا هاتووە: هەردوو پێشەنگی پەکەکە، عیرفان گولەر (عادل ئورفا) و سەعید ئولچو (فەرات پیر) لە ڕۆژی ١٤ و ٢٩ی ئازاری ئەمساڵ بە نەخۆشیی لە کوردستانی سووریا گیانیان لەدەست داوە.
لە بەشێکی دیکەی ڕاگەیەندراوەکەدا ئاماژە بەوەکراوە، شوێنی عیرفان گولەر و سەعید ئولچو، پڕ ناکرێتەوە، چونکە ئەو دوو کەسە هەموو ژیانی خۆیان لە پێناو تێکۆشان بۆ دەستخستنی ئازادیی گەلی کورد و مرۆڤایەتی تەرخان کردبوو.
عادل ئورفا و سەعید ئولچو لە پێشەنگانی پارتی کرێکارانی کوردستانی تورکیان و لەسەرەتای دامەزراندنی پەکەکەوە پەیوەندییان پێوەکردووە.
وەک کۆمیتەکەی پەکەکە باسی لێوەکردووە، ئەو دوو سەرکردەی پەکەکە، لەسەرەتای شۆڕش لە ساڵانی حەفتاکان بەشداربوون و دواتر هەریەکەیان زیاتر لە ٢٠ ساڵ لەناو زیندانی تورکیادا ماونەتەوە، پاش ئازادکردنیشیان، لە ساڵی ٢٠٠٠ و ٢٠٠١دا گەڕانەوە بۆ چیاکانی کوردستان.
بۆچوونی بەکارهێنەران