کوژرانی دوو سەربازی تورکیا لە هەرێمی کوردستان
بەپێی هەواڵی کوردپرێس، بەگوێرەی راگەیێندراوی وەزارەتی بەرگریی تورکیا کە لە هەژماری فەرمیی خۆیدا لە تویتەر بڵاوی‌کردووەتەوە، ۲ سەربازی گرێبەست بە ناوەکانی حەسەن تاش و فورقان گونەرگۆک لە ناوچەی ئۆپەراسیۆنی چنگ - قوفڵ تەقەیان لێکراوە و بە سەختی بریندار بوون. دوای ئەوەی گواستراونەتەوە بۆئەوەی چارەسەر بکرێن، گیانیان لەدەست‌داوە.
هەروەها رۆژی ۲۹ی حوزەیرانی ۲۰۲۳ ناوەندی چاپەمەنی و راگەیاندنی هەپەگە رایگەیاند، گەریلاکانی پارتی کرێکارانی کوردستان - پەکەکە هێرشیان کردووەتە سەر کاروانێکی سەربازیی سوپای تورکیا لە ناوچەی زاپ و لە ئەنجامی رووبەڕووبوونەوەیەکی سەختدا سێ سەرباز کوژراون و سێ گەریلاش، کە دووانیان دوای ئەوەی بە سەختی برینداربوون، گیانیان لەدەست‌دا.
لە راگەیێندراوەکەی هەپەگە جەخت لەوەش کراوەتەوە، سوپای تورکیا لە رێگەی فڕۆکە بێفڕۆکەوانەکان، تۆپهاوێژ و فڕۆکە جەنگییەکانیەوە، پێگەکانی پەکەکە لە ناوچە جیاوازەکانی زاپ، مەتین، خواکوڕک، ئامێدی و ئاڤاشین بۆردوومان دەکەن.
بەرەبەیانی رۆژی ۱۸ی نیسانی ۲۰۲۲ ئۆپەراسیۆنی ناسراو بە چنگ - قوفڵ لەلایەن سوپای تورکیاوە لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە لە هەرێمی کوردستان دەستیپێکرد.
بۆچوونی بەکارهێنەران