تەندروستیی جیهانی 85 تەن کەلوپەلی پزیشکیی بۆ کوردەکانی سووریا نارد
کوردپرێس:
ڕێکخراوی تەندروستیی جیهانی ڕایگەیاند دووهەم وەجبەی هاوکارییە پزیشکییەکانی ئەو ڕێکخراوەیە کە لە دوو بارهەڵگری 22 تەنی و 31 تەنی پێکهاتبوون بۆ یارمەتیدانی کوردەکانی باکووری خۆرهەڵاتی سووریا ڕادەستی دیمەشق کرا و دوو وەجبەی دیکەش بە زووترین کات ڕادەست دەکرێت.
بە گوێرەی بەیاننامەکەی ڕێکخراوی تەندروستیی جیهانی ئەو ڕێکخراوەیە سەر بە نەتەوەیەکگرتووەکانە و یارمەتییە پزیشکییەکانی لە مەخزەنەکەی خۆیەوە ناردووە کە لە هەولێرە پێتەختی هەرێمی کوردستان.
ڕێکخراوی تەندروستیی جیهانی لە درێژەدا نووسیویەتی کۆی 85 تەن کەلوپەلی پزیشکی و پێداویستیی هاووڵاتییانی تووشبوو یان لە مەترسیی تووشبوون لە باکووری خۆرهەڵاتی سووریا بە زوووترین کات دەگاتە ئەو ناوچەیە و ئەمەش بەشێکە لە بەرنامەی ڕێکخراوی تەندروستیی جیهانی بۆ بەرپەرچدانەوەی کۆرۆنا ڤایرۆس لە باکووری خۆرهەڵاتی سووریا.
بۆچوونی بەکارهێنەران