زیندانییانی داعش له‌ حه‌سه‌كه‌ پشێوییان ناوه‌ته‌وه‌

کوردپرێس:

ئاژانسی هه‌واڵی سانای ره‌سمیی سووریا بڵاویكرده‌وه‌، ئه‌مڕۆ یه‌كشه‌ممه‌ زیندانیكراوانی داعش له‌ زیندانی حه‌سه‌كه‌ی باكووری خۆرهه‌ڵاتی سووریا پشێوییان دروست كردووه‌ و رووبه‌ڕووی پاسه‌وانه‌كانی زیندانه‌كه‌ بوونه‌ته‌وه‌.

ئاژانسه‌كه‌ نووسیویه‌تی: له‌ كاتی روودانی پشێوییه‌كه‌دا هێلیكۆپته‌ره‌كانی ئه‌مه‌ریكا بۆ ماوه‌ی دوو كاتژمێر به‌ ئاسمانی ناوچه‌كه‌دا سووڕاونه‌ته‌وه‌.

به‌ گوێره‌ی سه‌رچاوه‌ی زانیاری ئه‌و ئاژانسه‌، ژماره‌یه‌ك لێكۆڵه‌ری ئه‌مه‌ریكایی سه‌ردانی زیندانه‌كه‌یان كردووه‌ و ویستوویانه‌ ژماره‌یه‌ك له‌ زیندانیكراوه‌كان بگوازنه‌وه‌ بۆ بنكه‌یه‌كی ئه‌مه‌ریكا له‌ ده‌وروبه‌ری حه‌سه‌كه‌.

ئه‌و زیندانه‌ی پشێوییه‌كه‌ی تێدا به‌رپا بووه‌، له‌ ژێر كۆنترۆڵی هێزه‌كانی سووریای دیموكرات(هه‌سه‌ده‌)یە.