شاندێکی هەرێمی کوردستان بۆ ڕێکەوتن لەسەر نەوت و گومرگ دەچێتەوە بەغدا

بەپێی هەواڵی کوردپرێس، حەسەن ئاڵی پەرلەمانتاری کورد لە پەرلەمانی عێراق، بە خەڵک-ی ڕاگەیاندووە: "هەنگاوی ناردنی 400 ملیار دينار لەلایەن بەغداوە، هەنگاوێکی ئەرێنییە ڕووە و چارەسەرکردنی کێشە و ناکۆکییەکان و بەستنی ڕێکەوتنێک لەنێوان بەغدا و هەولێر".

بە وتەی حەسەن ئاڵی شاندەکەی حکوومەتی هەرێم لەسەر هەموو دۆسێکان گفتووگۆ لەگەڵ مستەفا کازمی سەرۆک وەزیران و عەلی عەبدولئەمیر عەللاوی وەزیری دارایی دەکات، لە سەردانەکەشدا رێکەوتنی هەمەلایەنە لەنێوان هەردوولادا دەکرێت.

بەپێی ماڵپەڕی بغداد الیوم-ی عێراقيش، سەرچاوەیێک لە حکوومەتی هەرێمی کوردستان ڕایگەیاندووە مەسرور بارزانی سەرۆکی حکوومەت، ئەندامانی حکوومەتەکەی ڕاسپاردووە هەماهەنگی لەگەڵ بەغدا بکەن و دۆسێی هەموو داهاتەکانی هەرێمی کوردستان بخەنەڕوو، تا لەلایەن لیژنە پسپۆڕەکانەوە وردبینیان تێدا بکرێت.

سەرچاوەکە دەڵێت هەرێمی کوردستان داهاتی 250 هەزار بەرمیل نەوتى ڕۆژانە و داهاتی تەواوەتی خاڵە گومرییەکان ڕادەست دەکات، تا لەبەرانبەردا حکوومەتی فیدراڵ مووچەی فەرمانبەران و پێشمەرگە و شایستە داراییەکانى تر ڕەوانە بکات.

کۆدی هەواڵنێر: 60113