مەسعوود بارزانی لەگەڵ ئەمیری كوێت كۆبۆوە
کوردپرێس:
بەپێی هەواڵێکی ماڵپەڕی فەرمیی پارتی دیموکراتی کوردستان لەدرێژەی سەردانەكەی بۆ وڵاتانی كەنداو، مەسعوود مەسعود بارزانی لەگەڵ شاندی یاوەری كە پێكهاتبوو لە مەسروور بارزانی ڕاوێژكاری ئەنجومەنی ئاساییشی كوردستان و ئازاد بەرواری ئەندامی مەكتەبی سیاسیی پارتی دیموكراتی كوردستان، سەردانی كوەیتی كرد و سەرلەبەیانیی ڕۆژی سێشەممە 27ـی 11ـی 2018 لە لایەن سمو شێخ سەباح ئەلئەحمەد ئەمیری كوەیت پێشوازی كرا.
لەو كۆبوونەوەیێكدا بیروڕا لەبارەی دوایین پێشهاتە سیاسی و گۆڕانكارییەكانی عێراق و ناوچەكە ئاڵوگۆڕ كرا و هەروەها ڕۆشنایی خرایە سەر پەیوەندییەكانی هەرێمی كوردستان و وڵاتی كوەیت و چۆنییەتی پێشخستنی ئەو پەیوەندییانە.
پڕۆسەی سیاسیی عێراق و هەنگاوەكانی پێكهێنانی حكوومەتی تازەی عێراق تەوەرێكی دیكەی ئەو دیدارە بوو.
هەر هەمان ڕۆژ مەسعوود بارزانی و شاندی یاوەری لەگەڵ شێخ ناسر سەباح ئەلئەحمەد جێگری سەرۆکوەزیران و وەزیری بەرگریی كوەیت كۆ بوونەوە. لەو كۆبوونەوەیەدا بارودۆخی سیاسیی عێراق و ناوچەكە و پەیوەندییەكانی هەردوولا تاوتوێ كرا و جەخت لەسەر پەرەپێدانی پەیوەندییەكانی نێوان هەرێمی كوردستان و وڵاتی كوەیت كرایەوە.
دواین وێستگەی سەردانی مەسعوود بارزانی و شاندی یاوەری بۆ وڵاتی كوەیت سەردانیكردنی ناوەندی كولتووریی شێخ جابر ئەلئەحمەد و هەروەها دیدار و كۆبوونەوەیان بوو لەگەڵ بەڕێوەبەری گشتیی سندووقی كوەیتیی گەشەپێدانی ئابووریی عەرەبی.
بۆچوونی بەکارهێنەران