جێگری وه‌زیری ده‌ره‌وه‌ی ئه‌مه‌ریكا پشتگیریی وڵاته‌که‌ی بۆ هه‌رێمی کوردستان دووپات کرده‌وه
به‌پێی هه‌واڵی کوردپرێس، ڕۆژی دووشه‌ممه 15ی تشرینی یه‌که‌می 2018 نێچیرڤان بارزانی سه‌رۆكوه‌زیرانی هه‌رێمی كوردستان پێشوازی له جۆن سولیڤان جێگری وه‌زیری ده‌ره‌وه‌ی ئه‌مه‌ریكا و شاندێكی باڵای یاوه‌ری كرد كه له ژه‌نه‌رال میگی ڤادل یاریده‌ده‌ری سه‌رۆكی ده‌سته‌ی ئه‌ركانی هابه‌ش، دۆگلاس سیلیمان باڵیۆزی ئه‌مه‌ریكا له عێراق، ستیڤ ڤاگن كونسووڵی گشتیی ئه‌مه‌ریكا له هه‌رێمی كوردستان و چه‌ند به‌رپرسێكی دیكه‌ی دیپلۆماسی و سه‌ربازیی ئه‌مه‌ریكا پێكهاتبوو.
له دیداره‌که‌دا سولیڤان پیرۆزبایى له نێچیرڤان بارزانى كرد بۆ سه‌ركه‌وتنى هه‌ڵبژاردنى په‌رله‌مانى كوردستان و سه‌ركه‌وتن به سه‌ر داعشدا و هه‌روه‌ها پشتگیریى ئه‌مه‌ریكاى بۆ هه‌رێمى كوردستان دووپات كرده‌وه و داواى به‌رده‌وامیى گفتوگۆكانى هه‌ولێرـ به‌غداى كرد بۆ چاره‌سه‌ركردنى كێشه‌كان و هاریكاریى ئه‌منى و ئابوورى.
جێگری وه‌زیری ده‌ره‌وه‌ی ئه‌مه‌ریکا تیشكى خسته سه‌ر دوایین پێشهاته‌كانى عێراق و هیواى خواست هه‌موو سه‌ركرده عێراقییه‌كان كار بكه‌ن بۆ ئه‌وه‌ى له كاتى دیاریكراوى خۆیدا و به‌پێى ده‌ستوورى عێراق، حكوومه‌تى تازه‌ى عێراق ده‌ستبه‌كار ببێت.
لای خۆیه‌وه نێچیرڤان بارزانی سه‌رۆک وه‌زیرانی هه‌رێمی كوردستان سوپاسی ئه‌و سه‌ردانه و هاوكارییه‌كانی ئه‌مه‌ریكای بۆ هه‌رێمی كوردستان كرد و پوخته‌یێكى ده‌رباره‌ى پرۆسه‌ی سیاسیی عێراق و به‌شداریی هه‌رێمی كوردستان تیایدا و پرۆسه‌ی سیاسی له هه‌رێمی كوردستان و هه‌ڵبژاردنه‌كانی په‌رله‌مانی كوردستان خسته ڕوو.
کۆدی هه‌واڵنێر: 60103
بۆچوونی بەکارهێنەران