وەزارەتی پێشمەرگە: بەو جۆرە ئۆپراسیۆنانەی سوپای عێراق مەترسی داعش كۆتایی نایەت
کوردپرێس:
لیوا قارەمان كەمال جێگری سەرۆكی دەستەی ئەركانی ئۆپراسیۆنەكانی وەزارەتی پێشمەرگە، رایگەیاند: وەزارەتی بەرگریی عێراق بەڕەسمی داوای لەوەزارەتی پێشمەرگە كرد، لەڕووی هەماهەنگی و پەیوەندیكردنەوە بەشدار بین لە ئۆپراسیۆنەكەی سوپای عێراق لەكەركووک و دیالە و تكریت.
ناوبراو وتیشی:"وەزارەتی پێشمەرگە لەسەر ئەو داوایەی وەزارەتی بەرگریی عێراق رەزامەندیی دەربڕیوە و ئێستا لەسەر ئەو ئۆپرسیۆنە هەماهەنگی لەنێوان هەردوولادا هەیە".
بەرپرسەكەی وەزارەتی پێشمەرگە رەتی كردەوە، هێزی پێشمەرگە بەشداربێت لەئۆپراسیۆنەكە و وتی"هێزەكانمان لەشوێنی خۆیان دەمێننەوە و تەنها لەیەك كاتدا بەرگری دەكات ئەگەر تیرۆریستانی داعش هێرشیان بكاتە سەر".
ئەوەشی راگەیاند، ئۆپراسیۆنەكە چەند رۆژێك دەخایەنێت و ئەو ناوچانە دەگرێتەوە كە دەكەونە نێوان هێزی پێشمەرگە و سوپای عێراق و بۆشاییی ئەمنیی تێدا دروست بووە.
بەوتەی لیوا قارمان، بەو ئۆپراسیۆنە كۆتایی بە داعش نایەت، تەنها چارەسەریش گەڕانەوەی هێزی پێشمەرگەیە بۆ ئەو ناوچانەی كە پێشتر لێی بوون.
بۆچوونی بەکارهێنەران