سەرۆکی حکوومەتی هەرێم لەگەڵ شاندێکی مانگی سووری ئیمارات دیداری کرد
کوردپرێس:
ڕۆژی سێشەممە 25 ی ئایاری 2021 مەسروور بارزانی سەرۆکی حکوومەتی هەرێمی کوردستان پێشوازیی لە محەمەد ئەلفەلاحی ئەمینداری گشتیی دەستەی مانگیی سووری ئیماراتی و شاندێکی یاوەری کرد.
لە دیدارەکەدا کە ئەحمەد ئەلزاهری کونسولی گشتیی ئیمارات لە هەولێر ئامادەی بوو، شاندی میوان سڵاو و ڕێزی شێخ محەمەد بن زاید ئال نەهیان جێنشینی ئەبوزەبی-یان بە سەرۆکی حکومەت گەیاند و ئاماژەیان بە گرنگیی پەرەپێدانی پەیوەندی نێوان هەرێمی کوردستان و ئیمارات کرد لە هەموو بوارەکاندا، جەختیشیان کردەوە کە ئیمارات بەردەوام دەبێت لە یارمەتیدانی ئاوارە وپەنابەران لە هەرێمی کوردستان بەتایبەتی لە دابینکردنی ڤاکسینی کۆرۆنا بۆ کەمپەکان .
شاندی ئیماراتی هەروەها خۆشحاڵی خۆیان بە هەبوونی هەماهەنگیی لە گەڵ دەزگای خێرخوازیی بارزانی نیشاندا کە بەردەوامن لە ئەنجامدانی چەندین بەرنامە و پڕۆژەی خێرخوازی هاوبەش.
سەرۆکی حکومەت سوپاس و پێزانینی خۆی بۆ هاوکارییەکانی دەولەتی ئیمارات و بەتایبەتی مانگی سووری ئیماراتی دەربڕی و خواستی حکوومەتی هەرێمی کوردستانیشی بۆ برەودانی زیاتر بە پەیوەندییەکان لە گەڵ ئیمارات دووپات کردەوە.
بۆچوونی بەکارهێنەران