تونجەر باقرخان: ئامادەی بنیاتنانی کۆماری دیموکراتیک لە تورکیاین
بەپێی هەواڵی کوردپرێس، تونجەر باقرخان، هاوسەرۆکی گشتیی پارتی یەکسانی و دیموکراسیی گەلان لە پێنجەمین کۆنگرەی ئاسایی دەم پارتی وتارێکی پێشکەش کرد و لە سەرەتادا سڵاوی ئاڕاستەی گەلانی تورکیا و کوردستان کرد و ئاماژەی بەوە دا کە "ڕێبەر ئاپۆ هیوای ئاشتی بە هەموان بەخشیوە. باقرخان جەختی لەوە کردەوە کە سەرڕای هەموو گوشار و زۆردارییە بەردەوامەکان، ئەوان هەرگیز دەستیان لە تێکۆشان هەڵنەگرتووە و بە پێوە ماونەتەوە، بەڵێنی دا کە بۆ بنیاتنانی کۆمارێکی دیموکراتیک بەردەوام دەبن لەسەر ڕێڕەوی خۆیان".
هاوسەرۆکی دەم پارتی ڕەخنەی لە ئەدای ڕابردووی پارتەکەی گرت و دانی بە هەندێک کەمکوڕیدا نا؛ ڕایگەیاند کە نەیانتوانیوە وەک پێویست پەیامەکانیان بگەیەننە ناو کۆمەڵگە و زۆرجار خۆیان دووبارە کردووەتەوە.
هەروەها ئاماژەی بە سستی لە دروستکردنی پەیوەندی بەهێز لەگەڵ پێکهاتە و باوەڕە جیاوازەکان، کەم تەرخەمی لە تێکۆشانی ژینگەپارێزی، و نەبوونی کاریگەری تەواو لە کەمپینەکانی دژ بە ماددە هۆشبەرەکان کرد، بەڵام جەختی کردەوە کە بە یەکگرتوویی ئەم کەمکوڕییانە تێدەپەڕێنن.
باقرخان داوای کرد، ڕێگەی سێیەم کە ڕێگەی گەل، ژنان و بنەدەستانە بگیرێتەبەر، چونکە نە دەسەڵاتی پێش ئاکەپە و نە خودی ئاکەپە نەیانتوانیوە کێشەکان چارەسەر بکەن و دەم پارتی ئێستا ئامادەیە بۆ گرتنەدەستی دەسەڵات و بەڕێوەبردنی تورکیا.
باقرخان باسی لە قەیرانە مێژووییەکانی تورکیا کرد و گوتی کۆماری سەد ساڵەی ڕابردوو نەبووەتە وەڵامدەرەوەی خواستەکانی گەل و تەنیا قەیرانی بەرهەمهێناوە کە سەرچاوەکەی بۆ چارەسەرنەکردنی پرسی کورد دەگەڕێتەوە. هاوکات ڕوونیکردەوە کە سەرکەوتنی کوردان مەترسی نییە، بەڵکو سەرکەوتنی تورکەکانیشە.
لە کۆتاییدا، باقرخان ڕایگەیاند کە ئەوان گەرەنتی پرۆسەی داهاتوون و لەمڕۆوە "بزووتنەوەی کۆماری دیموکراتیک" ڕادەگەیەنن، کە تێیدا خۆیان بە بەرپرسیار لە هەر بستێکی خاکی تورکیا دەزانن. دوای پێشکەشکردنی ئەم گوتارە و خستنەڕووی نەخشەڕێگای نوێ، کارەکانی پێنجەمین کۆنگرەی دەم پارتی بە داخراوی لەبەردەم دەزگاکانی ڕاگەیاندندا بەردەوامییان پێدرا.
بۆچوونی بەکارهێنەران