دادوەرێک لە پارێزگای ورمێ بە دەرکردنی حوکمی بەدیل بەرپەرچی کۆرۆنا دەداتەوە
بەشی ئازەربایجانی خۆرئاوا- بەڕێوەبەری تۆڕۆ تەندروستیی سەڵماس ڕایگەیاند دادوەرێکی ئەو شارە لەجیاتی حوکمی زیندان، تاوانبارانی ناچار کردووە بۆ بەرپەرچدانەوەی کۆرۆنا شەقام خاوێن بکەنەوە و یارەمەتیی کەرتی تەندروستی و پزیشکی بدەن.
کوردپرێس:
حەمید ڕەزا جەباری بەڕێوەبەری تۆڕۆ تەندروستیی سەڵماس لە لێدوانێکدا ڕایگەیاند دادوەر "موحسین مورادی" دادوەری لقی 103ی دادگای سزاکانی سەڵماس داهێنانی کردووە و لە جیاتیی دەرکردنی حوکمی زیندان بۆ تاوانباران، حوکمی کردووە بەوەی تاوانبارەکە لە خاوێن کردنەوەی شەقامەکان و دابین کردنی کەرەستە و مادەی خاوێن کردنەوە یارمەتیی کەرتی تەندروستیی شارەکە بدات.
ناوبراو زیادی کرد ئەو دادوەرە حوکمی زیاتر لە 1000 کاتژمێر خاوێن کردنەوەی شارەکەی بۆ تاوانباران دەرکردووە و ئەوەش وەک حوکمێکی بەدیل بۆ زیندان.
جەباری گوتیشی دادوەرە خاوەن داهێنانەکە بە حوکمە بەدیلەکانی یارمەتیی کەرتی پزیشکی و تەندروستیی داوە و جگە لە خاوێن کردنەوەی شار، هەندێک لە تاوانبارانیش ناچار کراون بە دابین کردنی کەرەستەی خاوێن کردنەوە.
بۆچوونی بەکارهێنەران