سوپای پاسداران ئامێرێکی نوێی بۆ ئاشکراکردنی ڤایرۆسی کۆرۆنا دروست کردووە

کوردپرێس:

ڕۆژی چوارشەمە 27ی خاکەلێوەی 1399 سەردار حوسێن سەلامی فەرماندەی سوپای پاسدارانی ئێران پەردەی لە سەر ئامێرێکی نوێ لادا کە توانای ئاشکراکردنی ڤایرۆسەکانی لە هەموو جیگا و شتەکان هەیە.

سەردار سەلامی لەبارەی داهێنانەکەی سوپای پاسدارانەوە وتی: ئەمە ئامێرێکی ئەلەکترۆنییە کە بە هێڵێکی مەگنەتیکی کار دەکات و بەو دوو ڤایرۆسەی تێیدا چێندراوە توانای ئەوەی هەیە تا مەودای 100 مەتریی دەوروبەری خۆی بپێوێت و هەر جیگایێک یان هەر شتێکی ئەو دەوروبەرە بە ڤایرۆس ئالوودە بووبێت ئاشکرای دەکات.

فەرماندەی سوپای پاسداران گوتیشی ئەمە ئامێرێکی بەسوودە کە لە نەخۆشخانەکانی ئێران تاقی کراوەتەوە و ڕاستی دۆزیی بۆ کراوە و لە سەروو 80 لە سەد کارکردنەکەی تەواوە و لە ڕووبەڕووبوونەوەی کۆرۆنا بەکار دەهێنرێت.

ناوبراو ئەوەشی زیاد کرد بەو ئامێرە چیتر پێویست ناکات ئەو شوێنانەی ئالوودەی ڤایرۆس نەبوون خاوێن بکرێنەوە و ئامێرەکە تەنها بۆ ڤایرۆسی کۆرۆنا نییە بەڵکوو بۆ هەموو جۆرە ڤایرۆسێک بەکار دەهێنرێت.

کۆدی هەواڵنێر: 60101