هێرشی داعش بۆ سەر گوندێکی مەخموور کوژراوی لێکەوتەوە
بەشی عێراق و هەرێمی کوردستان- لێپرسراوی کۆمیتەی مەخمووری یەکێتی گوتی: تیرۆریستانی داعش پەلاماری گوندێكی مەخمووریان دا کە بەهۆیەوە دوو هاووڵاتیی دانیشتووی گوندەكە کوژران.
کوردپرێس: ڕۆژی چوارشەممە ۳ی ئاداری ۲۰۲۰ ڕەشاد گەڵاڵی لێپرسراوی كۆمیتەی مەخمووری یەكێتیی نیشتمانیی كوردستان بە PUKmediaی ڕاگەیاند: شەوی ڕابردوو تیرۆریستانی داعش پەلاماری گوندی مارواشی سەر بە ناحیەی قەراجی مەخمووریان دا و دوو هاووڵاتیی دانیشتووی گوندەكەیان کوشت.
ناوبراو وتیشی: تیرۆریستان بە جلوبەرگی سەربازییەوە پەلاماری گوندەكەیان داوە و دوای کوشتنی ئەو دوو هاووڵاتییەش هەڵهاتوون.
ڕەشاد گەڵاڵی درێژەی پێدا: هێزە ئەمنییەكانی ناوچەكە لێكۆڵینەوەیان لە ڕووداوەكە دەستپێكردووە و لە كاتی لێكۆڵینەوەشدا بۆمبێكیان پێدا تەقییەوە و لە ئەنجامدا سێ کەس لە هێزە ئەمنییەكان بریندار بوون.
کۆدی هەواڵنێر: ٦۰۱۰۳
بۆچوونی بەکارهێنەران