سەرۆک وەزیرانی عێراق بەرەو کوەیت بەڕێکەوت

بەپێی هەواڵی کوردپرێس، نوسینگەی عادل عەبدولمەهدی سەرۆک وەزیرانی عێراق ئەمڕۆ چوارشەممە بڵاویکردەوە، عەبدولمەهدی بە سەردانێکی فەرمی بەرەو کوەیت بەڕێکەوت.

سەرۆک وەزیرانی عێراق دوێنێ سێشەممە ڕایگەیاند: سبەینێ سەردانی کوەیت دەکات بۆ گفتوگۆکردن سەبارەت بەو کێشە و پرسانەی کە جێی بایەخی هەردوولان.

لە ماوەی چەند ساڵی ڕابردوودا بە مەبەستی بەهێزکردنەوەی پەیوەندییەکانی نێوان هەردوو وڵات، چەند شاندێکی باڵای عێراقی سەردانی کوەیتیان کردووە.

لە ماوەی شەڕی داعش و دروست بوونی قەیرانی دارایی بۆ دەوڵەتی عێراق، حکوومەتی کوەیت بڕیاریدا قەرزی قەرەبووکردنەوەکانی لەسەر عێراق بۆ دوای شەڕەکە ڕابگرێت.

جگە لەوەش عێراق و کوەیت چەندین کێشەی هەڵپەسێردراوی هاوبەشیان هەیە، بەتایبەت بیرە نەوتەکانی سنوور، کە پێشتر هەردوولا ڕایانگەیاندووە کار بۆ ڕێککەوتنێکی هاوبەش دەکەن بە مەبەستی دەرهێنانی نەوتەکەی بە هاوبەشی.

کۆدی هەواڵنێر: 60113