بەرز بوونەوەی هەڵاوسان لە کوردستان ئەنجامی نەبوونی چاودێریی دەزگا پێوەندییدارەکانە

ئەحسەن عەلەوی نوێنەری خەڵکی سنە، کامیاران و دیواندەڕە لە ئەنجومەنی نوێنەرانی ئێران بە کوردپرێسی ڕاگەیاند: نەبوونی چاودێریی دامودەزگا جێبەجێکارییەکان هۆکاری بەرز بوونەوەی ڕێژەی هەڵاوسان لە کوردستانە.

ناوبراو زیادی کرد لە کۆبوونەواوەکاندا کە لەبارەی بەرزبوونەوەی هەڵاوسان لە کوردستان بەڕێوەچوو ڕایدەگەیێنن کە هۆکاری ئەم ڕێژەی هەڵاوسانە لە کوردستان گواستنەوە و دوور بوونی پارێزگا لە ناوندەکانی وەبەرهێنانە بەڵام پرسی گواستنەوە لە پارێزگاکانی دیکەش هەیە بۆیە دەبێت بەرز بوونەوەی ئاستی هەڵاوسان لە کوردستان بەشێوەی وردتر بەدواداچوونی بۆ بکرێت.

نوێنەری خەڵکی کوردستان وتیشی قاچاخی کەلوپەل و هەناردەکردنی ژمارەیێک لە پێداویستییەکانی پارێزگا و شاردنەوەی کاڵا هۆکارەکانی بەرزبوونەوەی هەڵاوسان لە کوردستانن کە دەبێت ڕێگرییان لێبکرێت تاکوو نرخەکان هاوسەنگ ببنەوە.

کۆدی هەواڵنێر: 60113