عادل عەبدولمەهدی: عێراق نابێتە بەشێک لە سیستەمی سەپاندی سزاکانی سەر ئێران

کوردپرێس:

بەپێی راگەیێندراوێکی نووسینگەی سەرۆکوەزیرانی عێراق، ئەمڕۆ چوارشەممە 6-2-2019 عادل عەبدولمەهدی، سەرۆکوەزیرانی عێراق لەگەڵ عەبدولناسر هیمەتی، پارێزگاری بانکی ناوەندیی ئێران و شاندی یاوەری کۆ بووەوە.

عادل عەبدولمەهدی لە کۆبوونەوەکەدا ئاماژەی بەوە کردووە، گەلی عێراق بەدەست گەمارۆدان ناڵاندوێتی و هەست بەوە دەکات گەلان بە هۆیەوە چەندە زیانیان پێدەگات. هاوکات گوتیشی عێراق بەشێک نابێت لە سیستەمی سزاکانی دژ بە ئێران و هەر گەلێکی دیکە.

هەروەها جەختی لەوە کردەوە، عێراق شکستی بە داعش هێناوە "بەهۆی قارەمانییەتیی رۆڵەکانی و خوێنی زۆربەی شەهید و بریندار و قوربانییەکان و پشتیوانیی دۆستەکانمان لە سەرووی هەموویانەوە کۆماری ئیسلامیی ئێران".

لای خۆیەوە پارێزگاری بانکی ناوەندیی ئێران، هیوای خواستووە هاوکاریی نێوان هەردوو وڵات بەتایبەتی لە بواری بانکی زیاتر بێت.