وتەبێژێکی یەپەگە: هێزەکانی ئێمە گەمارۆی سەرکردە باڵاکانی داعشیان داوە
کوردپرێس:
زانا ئامێدی وتەبێژێکی هێزی کوردی سووریا ناسراو بە یەپەگە بە ڕۆژنامەی واشەنتۆن پۆستی ئەمریکیی وتووە هێزەکانی سووریای دیموکرات کە لە شەڕڤانە کورد و عەرەبەکان پێکهاتووە دوایین ناوچەی ژێردەسەڵاتی داعشیان لە ڕۆژهەڵاتی سووریا گەمارۆداوە.
ناوبراو زیادی کرد ئێستا سەرکردە باڵاکانی داعش و پیاوکوژە سەرەکییەکانی ئەو گرووپە تیرۆریستییە لە ناوچەیێکی بەرتەسکی خاکی سووریا لە سنووری نێوان عێراق و سووریا گەمارۆ دراون. بەڵام ئەمریکییەکان و کوردەکان بە دووری دەزانن کە ئەبووبەکر بەغدادی سەرکردەی داعش لە نێو گەمارۆدراوەکاندا بێت. لەبەر ئەوەی پێ دەچێت زووتر لەو ناوچەیە ڕۆشتبێت.
ناوبراو جەختیشی کردەوە: ئەبووبەکر بەغدادی نەمردووە و لەو گوندانەشدا نییە کە یەپەگە وئەمریکییەکان گەمارۆیان داوە.
زانا ئامێدی گوتیشی: زۆرینەی ئەو داعشییانەی گەمارۆ دراون خەڵکی عێراقن بەڵام لە نێویاندا هاووڵاتیی ئەورووپی و ئەمریکی و ئاسیایییش هەیە.
مەزڵووم کۆبانێ فەرماندەی هێزی سووریای دیموکراتیش بە ئاژانسی هەواڵی فەڕەنسای وتووە لە ماوەی یەک مانگی داهاتوودا هێزەکانی داعش لە سنووری سووریاوە دەردەکرێن.
کۆدی هەواڵنێر: 60101
بۆچوونی بەکارهێنەران