وتەبێژی پارتی: کۆتاییی ئەم هەفتەیە شاندێکی هاوبەشی پارتی و یەکێتی دەچنە بەغدا
کوردپرێس:
مەحموود محەمەد گوتەبێژی پارتی دیموکراتی کوردستان لە میانەی پڕێس کۆنفرانسێکدا ڕایگەیاند: "گفتوگۆمان لەسەر چەند بابەتێکی هەنووکەیی کرد و وابڕیارە ڕۆژی هەینی شاندی پارتی و یەکێتی بۆ گفتوگۆکردن لەگەڵ لایەنە سیاسییەکانی عێراق بە شیعە و سووننەوە بەمەبەستی گفتوگۆکردن لەسەر بابەتی پێکهێنانی حکوومەت سەردانی بەغدا بکەن".
ناوبراو ڕاشیگەیاند: "باسی یەکڕیزیی نێو ماڵی کوردیشمان کرد ئەگەر بکرێت لایەنەکانی دیکەش بەشدار بن لەو لیژنە هاوبەشە و ئەو پڕۆژەیەی کە یەکێتی و پارتی ئامادەیان کردووە ڕەزامەندیی ئەوانیشی لەسەر بێت یاخود ئەگەر پێویست بێ هەندێ ڕای ئەوانیش لەسەر پڕۆژەکە زیاد بکرێت".
وتەبێژی پارتی ئاماژەی بۆ ئەوەش کرد کە لەو کۆبوونەوەیەدا باس لە گفتوگۆکردن و دانیشتن لەگەڵ لایەنە سیاسییەکانی دیکەی کوردستان کراوە بەتایبەتی ئەو چوار لایەنە سیاسییە کە لە ماوەی ڕابردوودا گازندەیان لەبارەی ئەنجامی هەڵبژاردنی پەرلەمانی عێراق هەبوو.
بۆچوونی بەکارهێنەران