ڕێکخراوی کۆچی نێوده‌وڵه‌تی: زیاتر له یه‌ک ملیۆن ئاواره‌ی عێراقی نه‌گه‌ڕاونه‌ته‌وه
به‌پێی هه‌واڵی کوردپرێس. ڕێکخراوی کۆچی نێوده‌وڵه‌تی له به‌یاننامه‌یێكدا بڵاوی كردۆته‌وه که مانگی نیسانى ساڵى 2016 لووتكه‌ى ئاواره‌بوون بوو له عێراق و نزیكه‌ى 3 ملیۆن و 42 هه‌زار كه‌س ئاواره بوون، ئه‌وه‌ش دواى به‌رپابوونى شه‌ڕى دژى ڕێكخراوى داعش له ناوچه‌كانیان به‌تایبه‌تى له پارێزگاكانى نه‌ینه‌وا و ئه‌نبار و سه‌ڵاحه‌ددین.
به‌پێى ڕاپۆرته‌كه، له‌م مانگه‌دا ڕێژه‌ى ئاواره‌بوون ڕووى له كه‌می كردوووه و بوووه به نیوه به‌ڵام له ئێستاشدا یه‌ک ملیۆن و 87 هه‌زار كه‌س ئاواره‌ن و نه‌گه‌ڕاونه‌ته‌وه ناوچه‌كانیان و بڕیاریان داوه له‌و ناوچانه‌ى كه ئاواره‌ن بمێننه‌وه و هۆكاره‌كانى مانه‌وه‌شیان بریتییه له وێران بوونى ماڵه‌كانیان و نه‌بوونى هه‌لى كار و ئاسایش.
لاى خۆشیه‌وه جیرارد وایت به‌ڕێوه‌به‌رى نێرده‌ى ڕێكخراوه‌كه ئاماژه‌ى به‌وه كردوووه که دۆزینه‌وه‌ى چاره‌سه‌رێكى هه‌میشه‌یی بۆ ئاواره‌كان پڕۆسه‌یێكى دوور و درێژه و پێویستى به هاریكاریى نێوان حكوومه‌ت و ئه‌و ڕێكخراو و لایه‌نانه‌یه كه كار له بوارى مرۆییدا ده‌كه‌ن.
هاوکات به‌رپرسێکى وه‌زاره‌تى کۆچ و کۆچبه‌رانى عێراق که ناوه‌که‌ی ئاشکرا نه‌کراوه ئاماژه به‌وه کردوووه که له‌وانه‌یه ژماره‌که زۆر له‌وه زیاتر بێت که له ڕاپۆرته‌که‌دا باس کراوه.
سه‌رچاوه: ڕادیۆ نه‌وا
کۆدی هه‌واڵنێر: 60103
بۆچوونی بەکارهێنەران