لە ئێستادا فەرەنسا ڕۆڵێکی گرینگ دەگێڕێت لە پرسی کورددا
«قەدری جان» ئەندامی لیژنەی ناوچەیی پارتی دیموکراتی کوردستانی سووریا و هەروەها ئەندامی شاندی نوێنەرایەتیی ئەنجومەنی نیشتمانیی کورد (ENKS) لە قامیشلۆ لە گفتوگۆ لەگەڵ کوردپرێسدا ئاماژەی دا بە کاریگەریی فەرەنسا لەسەر دۆخی کوردی سووریا و وتی: فەرەنسا وڵاتێکی زلهێزی جیهانییە و ڕۆڵێکی گرینگ دەگێڕێت لە ئەنجومەنی ئاسایشی نەتەوە یەکگرتووەکاندا.
ناوبراو درێژەی دا: لەبواری مێژوویشەوە فەرەنسا ڕۆڵی گێڕاوە و لەسەر دۆخی کورد کاریگەریی بووە و لە قۆناخە جیاجیاکاندا پشتگیریی لە کورد کردووە و پشتگیریی "فرانسوا میتران" و هاوسەرەکەی لە پرسی هەرێمی کوردستانی عێراقدا لە یاد ناکرێت.
قەدری جان زیاتر وتی: فەرەنسا لە پرسی کوردی سووریاشدا دەورێکی گرینگ دەگێڕت و لەبابەتی دانوستانی لایەنە کوردییەکانی سووریا هەوڵی زۆری داوە و سەردانەکەی ئەمدواییەی ماکرۆن بۆ هەرێمی کوردستان بەمانای قورسایەتیی کوردە لە سیاسەتی دەروەی ئیدارەی فەرەنسادا.
ئەندامی لیژنەی ناوچەیی پارتی دیموکراتی کوردستانی سووریا و هەروەها ئەندامی شاندی نوێنەرایەتیی ئەنجومەنی نیشتمانیی کورد (ENKS) لە قامیشلۆ جەختی کردەوە: ئێمە هیوادارین کە فەرەنسا بتوانێت بەگوێرەی پێگەی مێژووی کورد لە ئاستی نێونەتەوەییدا پشتگیریی لە کورد بکات و لەبارەی مافی کوردەکانی سووریاوە کەڵک لە هەموو ئامێرە دیپلۆماتیکەکان وەربگرێت.
کۆدی هەواڵنێر: 60113
بۆچوونی بەکارهێنەران