دیداری نێوان شاندی ئەمریکا و لایەنە کوردییەکانی سووریا دیدارێکی ئیجابی بوو
کوردپرێس:
ڕزوان سەیدۆ ئەندامی نووسینگەی یاساییی ئەنجومەنی نیشتمانیی کوردی سووریا (ENKS) لە لێدوانێکدا بۆ کوردپرێس ئاماژەی بە چارەنووسی دانوستانی نێوان حیزبەکەی و پارتەکانی یەکێتیی نیشتمانیی کوردی سووریا کرد و لەو بارەیەوە بە کوردپرێسی گوت: دیداری ئەم دوایییەی جێگری نوێنەری تایبەتی ئەمریکا بۆ کاروباری سووریا لەگەڵ لایەنە کوردییەکانی سووریا دیداری ئیجابی بوو و لێدوانەکانی ئەم دوایییەی ژنەراڵ مەزڵوو کۆبانێش لەبارەی پێشمەرگەی ڕۆژەوە باش بوو و سەلماندی کە هەڵوێستی ئاڵدار خەلیل سەرۆکی لیژنەی پارتەکانی یەکێتیی نیشتمانیی کوردی سووریا بۆ دانوستانە کوردییەکان هەڵوێستی نەشیاو بوو و ئەو وتانە ڕەت کرانەوە.
ناوبراو گوتیشی پاش دیداری شاندە ئەمریکییەکە هیوای ئەوە بووژایەوە کە پڕۆسەی دانوستانی لایەنە کوردییەکان دەست پێبکاتەوە.
ڕزوان سەیدۆ زیادی کرد: یەکێتیی نێون لایەنە کوردییەکان هیوا و ئاواتی هاووڵاتییانی کوردستانی سووریایە چوونکە بەرژەوەندیی کوردی سووریا لە سێبەری یەکێتیی نێوان لایەنەکان دەستەبەر دەبێت.
ناوبراو ئاشکراشی کرد: ئەنجومەنی نیشتمانی کورد ڕژدە لە دانوستانی نوێ و تا ئەم کاتەش هیچ لێدوانێکی توند و ئاڵۆزێنەری لەبارەی ڕەفتاری لایەنی بەرامبەری نەبووە.
ناوبراو لە کۆتاییدا گوتیشی پەیەدە لە لێدوانەکانیدا قسەی نەگونجاو بەرامبە ئەنەکەسە دەکات و ئەوەش لە کاتێکدایە ئەنجومەنی نیشتمانیی کوردی سووریا پێبەندە بە گفتوگۆ و ئەنجامەکانی و خۆی لە لێدوانی ناتەبا دەپارێزێت.
بۆچوونی بەکارهێنەران