73هەزار ئەندامی داعش و بنەماڵەکانیان بە دەستی هێزە کوردەکان ئەسیر کراون
بەپێی هەواڵی کوردپرێس، چەند ڕۆژ زیاتر بە سەر قسەکانی دۆناڵد ترەمپدا تێنەپەڕیوە کە ڕایگەیاند: "ئەگەر ئەورووپییەکان و وڵاتانی دیکە هاووڵاتییەکانی خۆیان کە لە ڕیزەکانی داعشدا بوون و ئێستا بە دەستی هێزە کوردەکان ئەسیر کراون وەرنەگرنەوە، ئەمریکا بەرەو وڵاتەکانیان ئازادیان دەکات". ئەم وتەیە هۆشدارێکی زۆر جیدی و ئەمنی بۆ ناوچەکەیە چوونکە ئەم ژمارە ئەسیرە کە ئێستا لە دەستی هێزە کوردیەکاندان شەڕئاشۆترین و وەفادارترین هێزەکانی گرووپی تیرۆریستیی داعشن.
«حاکم خەلۆ» هاوسەرۆکی ئەنجومەنی یاسادانان لە هەرێمی جزیرە بە کوردپرێسی وت: 73هەزار ئەندامی داعش و بنەماڵەکانیان بە دەستی هێزە کوردییەکان ئەسیر کراون و لە کەمپی "حول"دان.
هاوسەرۆکی ئەنجومەنی یاسادانان لە هەرێمی جزیرە زیاتر وتی: لە کونفرانسێکدا کە بە ئامادە بوونی ناوەندە نێونەتەوەییەکان و کەسانی سەرناس لە بواری مافی مرۆڤ لە باکووری سووریا بەڕێوەچوو باسی مەترسییەکان و دۆخی ئەسیرانی داعش کرا. لەم کونفرانسەدا جەختمان لە جیددی بوونی بەڕێوەبەرایەتیی خۆسەر کرد بۆ موحاکیمە کردنی ئەندامانی داعش.
حاکم خەلۆ وەبیری هێنایەوە: مانەوەی ئەسیرانی داعش لە خاکی سووریا لە باری ئەمنییەوە مەترسیی زۆری هەیە و لە لایێکی دیکەوە ژمارەیێک ژن و منداڵ لە کەمپەکاندان و ئەم دۆخە دژوارتر دەکات.
ناوبراو زیادی کرد وڵاتانی ئەورووپی دەبێت میکانیزمێک بۆ وەرگرتنەوەی هاووڵاتییە داعشەکانی خۆیان فەراهەم بکەن و باشتر وایە خەمسارد نەبن لە چارەنووسی هاووڵاتییەکانیان.
کۆدی هەواڵنێر: 60113
بۆچوونی بەکارهێنەران