فەرماندەیێکی پێشمەرگە:
بەغدا هیچ بەڵێنێکی بە هەولێر نەداوە تا پێشمەرگە بگەڕێتەوە
بەشی عێراق و هەرێمی کوردستان- شێخ جەعفەر مستەفا فەرماندەی هێزەکانی حەفتا رایگەیاند: پێنج لێژنەی فەرعی و لێژنەیێکی باڵا لە نێوان هەولێر و بەغدا پێکهاتوون و هەفتانە و مانگانە کۆ دەبنەوە و گەیشتوونەتە ڕێککەوتن بۆ ئەوەی دۆخی کەرکووک ئاسایی بکرێتەوە.
ئه‌و فه‌رمانده‌یه‌ی هێزی پێشمه‌رگه، گوتیشی: "لە ماوەیێکی کورتدا لە کەرکووک زۆر شت دەگۆڕێت".
لە بەرامبەریشدا سیروان بارزانی فەرماندەی میحوەری مەخموور و گوێڕی هێزی پێشمەرگه ئاشکرای کرد گفتوگۆ لە نێوان هەولێر و بەغدا هەیە، بەڵام بەغدا هیچ بەڵێنێکی بە هەولێر نەداوە تا پێشمەرگە بگەڕێتەوە.
ماوەیێکە قسە و باسەکان لە بارەی گەڕانەوەی هێزەکانی پێشمەرگە بۆ کەرکووک و ناوچە كوردستانییه‌كانی ده‌ره‌وه‌ی ئیداره‌ی هه‌رێم، گەرمتر و گەرمتر بوون، بە تایبەتیش کە یەکێک لە مەرجەکانی پارتی بۆ ئاسایی کردنەوەی دۆخی کەرکووک ئەو پرسەیە و لە گفتوگۆکانی پارتی و یەکێتیشدا یەکێکە لە خاڵە جێناکۆکە سەرەکییەکان.
یەکێتی پێیوایە پرۆسەی گەڕانەوەی پێشمەرگە هێندەی نەماوە بە ئەنجام بگات و لەماوەیێکی نزیکیشدا بە ئەنجام دەگات.
کۆدی هەواڵنێر: 60113
بۆچوونی بەکارهێنەران