چەسپاندنی لامەرکەزییەت و ئیدارەی خۆسەر گونجاوترین پڕۆژەی حکومڕانییە لە سووریا

حەسەن محەمەد عەلی ئەندامی ئەنجومەنی سووریای دیموکرات لە لێدوانێکدا بە ئاژانسی هەواڵی کوردپرێسی وتووە هەموو هەوڵی ئەنجومەنەکەیان بۆ پارێزگاری کردن لە یەکڕیزی و سەروەریی سووریا بووە و ئەزموونی 8 ساڵی ڕابردووش ئەو ڕاستییەی سەلماندووە بەڵام لە هەمان کاتدا دەشڵێت تاکە ڕێگای گەڕانەوەی ئارامی و ئاسایش بۆ سووریا چەسپاندنی لامەرکەزییەتە و پێویستە دەوڵەتی دیمەشق مل بە قبووڵ کردنی ئیدارەی خۆسەر بدات.

ئەو ئەندامەی ئەنجومەنی سووریای دیموکرات گوتیشی: "لەم قۆناغەدا کە تیرۆر لە سووریا ڕوو لە تەواوبوونە پێویستە لەپێناو پاراستنی سەروەریی خاکی سووریا بەرەو لامەرکەزییەت و چەسپاندنی ئیدارەی خۆسەری باکووری سووریا هەنگاو هەڵبێنین."

ناوبراو زیادیشی کرد: ئیدارەی خۆسەری دیموکراتی گونجاوترین سیستەمی حکومڕانییە بۆ سووریا چوونکە هەموو پێکهاتەکان بە ئایین و ڕەگەزە جیاوازەکان لە خۆ دەگرێت.

حەسەن محەمەد علی لەبارەی لامەرکەزییەتەوە ڕوونکردنەوەی بە هەواڵنێری کوردپرێس دا و گوتیشی: "لامەرکەزییە گوتارێکی بەهێز و گرینگی پڕۆسەی سیاسییە کە لەبەر ڕۆشناییی ئەزموونی شەڕی 8 ساڵە لە سووریا پێویستە سەرنجی بخرێتە سەر."

ناوبراو لە کۆتاییی لێدوانەکەی بۆ کوردپرێس ئەوەشی ئاشکرا کرد: "نەیارانی ئێمە بە داعش و بە تورکیاشەوە بەردەوام پلان و پیلان بۆ تێکدانی سامان و ئاسایشی ئێستامان دەدەن و دەیانەوێت ململانێ و موناقەشە لە نێوان خەڵکی باکوور و خەڵکی ڕۆژهەڵاتی سووریا دروست بکەن بۆ ئەو مەبەستەش تا ئەمڕۆکە زۆر ڕێگایان تاقی کردۆتەوە.