سکرتێری مه‌کته‌بی سیاسیی پارتی دیموکراتی کوردستان پێش بینی دەکات حزبەکەی لەم هەڵبژاردنە سەرکەوتنێکی گەورە دەهێنینەوە
بەپێی هەواڵی کوردپرێس، فازڵ میرانی، سکرتێری مه‌کته‌بی سیاسیی پارتی دیموکراتی کوردستان لە وتارێکدا لە ئەنجومەنی سەرکردایەتیی حزبەکەی، سەبارەت بەو لایه‌نانه‌ی قسە لەسەر حزبەکەی دەکەن، سکرتێری مەکتەبی سیاسی پارتی وتی: "ئەوەی سەیرە مونافیسینی ئێمە، تەنیا باسی ئێمە دەکەن، واتە ئێمە بە تەنیاین هەرچیمان کردبێت بە چاک و خراپەوە، ئەی خۆتان؟".
فازڵ میرانی وتیشی: "زەحمەت نەبێت با واز لە یەکتر بهێنین و لەبری ئەوەی بە خراپە باسی یەکتر بکەین، با باسی چاکەکانی خۆمان بکەین".
راشیگه‌یاند: "لە 10-10 سەرکەوتنێکی گەورە و زۆرینەیێکی تر لە کورسی دەهێنینەوە".
ناوبراو باسی له‌وه‌ش کرد: "لە دوای رووداوەکانی پاش ریفراندۆم، وەک کاک مەلا بەختیار دەڵێت (کاڵفامەکان) لێرە و لەوێ، لای خۆمان و لە بەغدایش، ویستیان ئەم دەستکەوتە نەهێڵن و بیرۆکەکەی کاڵ بکەنەوە".
فازڵ میرانی، چیرۆکی سەردانێکی پۆڵ بیرمەری حاکمی مەدەنی عیراقی بۆ لای مەسعوود بارزانی گێڕایەوە و وتی: "رۆژێک پۆڵ بریمەر دەیویست بێتەوە بۆ لای جەنابی سەرۆک، لە حەمرین بەولاوە تۆز و عاسیفە بووە، لە حەمرین بەملاوەیش بەفر بووە، ناچار بوون بە تەیارە بێنەوە. پۆڵ بریمەر وتی: سەرۆک بارزانی ئەم وڵاتە سەیرە، لەوبەری حەمرین وا بووە و مەمبەریش وا بووە. سەرۆک بارزانییش وتی: ئاخر مستەر بریمەر، خوا ئەم وڵاتەی بەش کردووە، ئێوە دەتانەوێت سنوورەکانی خوا بگۆڕن".
بۆچوونی بەکارهێنەران