لیژنە‌ی باڵای بایۆمە‌تریی هەرێمی کوردستان: 16 هەزار مووچەی نایاسایی رادەگرین
کوردپرێس:
ڕۆژی سێشە‌ممە 3ی نۆپێمبێری 2020 لیژنە‌ی باڵای جێبەجێکردنی قۆناغی دووەمی بایۆمەتری بە‌سە‌رپە‌رشتی قوباد تاڵە‌بانی جێگری سە‌رۆكی ئە‌نجومە‌نی وە‌زیران و ئامادە‌بوونی وە‌زیری دارایی و ئابوری، كۆبوونەوە‌ی ژمارە دووی ئەنجامدا.
بەگوێرەی راگەیەندراوی کۆبوونەوەکە، لە کۆبوونەوەکەدا، فەرمانگەی هەماهەنگی و بەدواداچوون و فەرمانگەی تەکنەلۆجیای زانیاری، پشتبەست بەئامار و داتاکانی بایۆمەتری، راپۆرتێکیان لەبارەی فرە‌مووچە‌یی پێشکەش کرد، بەپێی ئەو راپۆرتە 106 هەزار و 839 كەس لە یە‌ك مووچە زیاتر وەردەگرن کە زۆربەیان بەپێی یاسا رێکخراون.
ئەوەش خراوەتەڕوو، پاش بەدواداچوون بۆ دۆسیە‌ی ئەو مووچەخۆرانە، دە‌ركە‌وت 16 هەزار و 505 کەس، لە‌یە‌ك مووچە زیاتر بە نایاسایی وەردەگرن.
لە راگەیەندراوەکەدا هاتووە، لیژنە‌ی باڵا، لەچوارچیوەی یاسای چاکسازیدا، وە‌زارە‌تی دارایی و ئابوری راسپارد بۆ راگرتنی مووچەی داهاتوویان لەگەڵ پاراستنی مافی ئەو کەسانە بۆ تانەدان (طعن) لەم بڕیارە، ماوەی مانگێکیش دیاری کرا بۆ سەرلەنوی پێداچوونەوەی دۆسییەکانیان.
بۆچوونی بەکارهێنەران