ڕەخنە لە بڕیاری زیندانی کردنی سەرۆکی ئەنجومەنی پارێزگای کەرکووک دەگیردرێت

بەپێی هەواڵی کوردپرێس، جوان حەسەن، سەرۆکی لیژنەی مافی مرۆڤ لە ئەنجومنی پارێزگای کەرکووک، بە ماڵپەڕی فەرمیی پارتی دیموکراتی کوردستانی ڕاگەیاند: "بەداخەوە دادگای تێھەڵچوونەوەی کەرکووک بە پێی مادەی ٣٣١ی یاسای سزادانی عێراقی، فەرمانی گرتنی بۆ ڕێبوار تاڵەبانی دەرکردووە، کە بڕیارەکە سیاسییە، نەک یاسایی، چوونکە ئەو پارەی کاتی خۆی وەریگرتووە و ئێستا پێی سزا دراوە بۆ حکوومەتی گەڕاندووەتەوە، بەڵام بڕیاری گرتنی بۆ ھەڵوێستەکانی دەگەڕێتەوە کە پشتگیریی لە ڕیفراندۆم و ھەڵکردنی ئاڵای کوردستان کرد و دژی داگیرکردنی کرکووک بوو، بۆیە دەیانەوێت تۆڵەی لێ بکەنەوە و لە پۆستی سەرۆکی ئەنجومەن دەری بکەن".

جوان حەسەن گوتیشی: "خەڵک ھەیە بە ٥٠ملیار دینار پارەی خواردووە دەستگیر ناکرێت، بەڵام لەسەر ئەوەی پارەی وەکوو سەرۆکی ئەنجومەن وەرگرتووە بۆ مووچە و دواتر دادگا پێی گوتووە ئەو کارە ناکرێت پارەکەی بۆ حکوومەت گەڕاندووەتەوە، ئێستا شۆڤێنییەکان ھاتوون تۆڵەی لێ بکەنەوە لەپای ئەو ھەڵوێستانەی ھەیبووە، ئەگەرنا کارێکی نایاساییی نەکردووە.

کۆدی هەواڵنێر: 60113