14:35 PM   IRAQ
THURSDAY, 27 JUNE 2019
 به په‌له |◀   ئەردۆغان: سەردانی ئۆجەلان بە ئاگاداریی میت-ەوە ئەنجام دەدرێت
SATURDAY, 13 APRIL 2019 - 09:16
وەزیری بازرگانیی ئێران: تا ساڵی دابێ ئاڵوگۆڕی بازرگانیمان لەگەڵ عێراق دەگاتە 20 ملیار دۆلار

بەشی ئێران/ کوردی- وەزیری بازرگانیی ئێران لە لێدوانێکدا ڕایگەیاند: لە سەردانەکەی سەرۆککۆماری ئێران بۆ عێراق نەخشەڕێگایێک واژۆ کرا کە بەو پێیە تا ساڵی 1400 (2020) ڕێژەی هەناردەکردنی بەرهەمی ئێرانی بۆ عێراق دەگاتە 20 ملیار دۆلار.

بەپێی هەواڵی کوردپرێس ڕەزا ڕەحمانی وەزیری بازرگانیی ئێران پارێزگای کوردنشینی ئیلامی بەسەر کردۆتەوە و لە دانیشتنێکی ئەنجومەنی ئیداریی پارێزگاکەدا تیشکی خستۆتە سەر کەرتی ئابووری و ئاڵوگۆڕی بازرگانی لەگەڵ وڵاتی عێراق کە بە هۆی دەروازەی سنووری مێهرانەوە دەرفەتێکی باش ڕەخساوە بۆ ناردنی بەرهەمی ئێرانی بەرەو بازاڕەکانی عێراق و هەرێمی کوردستان.

ڕەحمانی لە دانیشتنەکەی ئەنجومەنی ئیداریی پارێزگای ئیلامدا ڕایگەیاند: بە بایەخی تەواوەوە دەڕواننە ئاڵوگۆڕی بازرگانی لەگەڵ وڵاتی عێراق و دەروازەی سنووری مێهرانیش یەک لەو دەرفەتانەیە کە دەکرێت بەهرەی باشی لێوەر بگیرێت. بەتایبەت بۆ ناردنی بەرهەمی ئێرانی بەرەو بازاڕەکانی عێراق و هەرێمی کوردستان.

وەزیری بازرگانیی ئێران بازاڕە نێودەوڵەتییەکانیشی بە گرینگ زانی و ڕایگەیاند: پارێزگای ئیلام بە هۆی دەروازەی سنووری مێهرانەوە دەرفەتێکی هەرە باشە بۆ ئێران کە بتوانێت بازاڕدۆزی بۆ بەرهەمی ئێران لە عێراق و هەرێمی کوردستان بکات و سنووری مێهران شایستەی ئەوەیە بکرێتە یەکێک لە جەمسەرەکانی ئاڵوگۆڕی بازرگانی بەتایبەت بۆ هەناردەکردنی کاڵای ئێرانی بەرەو عێراق.

ناوبراو گوتیشی لەبارەی دەروازەی سنووری مێهران و ئاڵوگۆڕی بازرگانی لەگەڵ وڵاتی عێراق دەسەڵاتی تەواو بە پارێزگاری ئیلام دەدرێت و دەوڵەت بەنیازە عیلاقاتی بازرگانیی نێوان ئێران و عێراق فراوانتر بکات.

ڕەحمانی داوای لە بەرپرسانی پارزگاکەش کرد تەرکیز بکەنە سەر کەرتی بەرهەمهێنان و ئاسانکاری کردن بۆ بەرهەمهێنەرانی نێوخۆیی.

شایانی باسە بە هۆی گەمارۆکانی ئەمریکاوە فرۆشتنی نەوتی ئێران سنووردار کراوە و ئەوەش کارتێکەر بووە لە دروستبوونی قەیرانی دارایی لە وڵاتی ئێران و بەو بۆنەیەشەوە دەوڵەتی ئێران هەوڵی فراوان کردنی ناردنی بەرهەمی نانەوتی بۆ وڵاتانی دراوسێ و بەتایبەتی عێراق دەدات بۆ ئەوەی کورتهێنانی داهاتەکەی قەرەبوو بکاتەوە هەر بەو بۆنەیەوە لەم ماوەیەی دواییدا سەرنجی زیاتری خستۆتە سەر سنوورەکانی نێوان ئێران و عێراق.

کليه حقوق اين پایگاه اطلاع‌رسانی متعلق به «خبرگزاری کردپرس» بوده و هرگونه استفاده از مطالب آن با ذکر منبع بلامانع است.

©2017 kurdpress. All rights reserved.
Designed & Powered By Atlas Samaneh - طراحی و توسعه توسط اطلس سامانه