ئایا کورده‌کانی سووریا "قامیشلی"یان کردووه‌ بە "قامیشلۆ"؟
به‌شی راپۆرت/ جیهان- توێژه‌رێکی پرسی کورده‌کان ئیدعا ده‌کات کورده‌کانی سووریا له‌ ڕێگای سه‌پاندنی زمان و فه‌رهه‌نگی خۆیان به‌سه‌ر دیکه‌ی ئیتنیکه‌کاندا ناوی شاره‌که‌یان گۆڕیوه‌ و مافی دیکه‌ی زمانه‌کانی سووریایان نادیده‌ گرتووه‌.
 کوردپرێس:
گرووپی تیرۆریستیی داعش ساڵی 2014 هێرشیان کرده‌سه‌ر ناوچه‌ کوردنشینه‌کانی سووریا، عێراق و دوو شاری کوردنشینی شه‌نگال له‌ عێراق و کۆبانێ له‌ سووریا له‌ هێرشه‌که‌دا به‌ته‌واوی خاپوور کران. کورده‌کان له‌ به‌رانبه‌ردا به‌ پشتیوانیی وڵاتانی جۆربه‌جۆر توانیان هێرشه‌که‌ی داعش تێکبشکێنن. کورده‌کان نه‌ک هه‌ر پاشه‌کشێیان به‌ داعش کرد به‌ڵکوو توانیان ناوچه‌ جێناکۆکییه‌کانیش کۆنتڕۆڵ بکه‌ن به‌ شێوازێک که‌ به‌گوێره‌ی هه‌ندێک ڕاپۆرت کورده‌کان له‌ هه‌رێمی کوردستان توانیویانه‌ له‌سه‌دا 40 به‌ خاکی ناوچه‌ی ژێر کۆنتڕۆڵی خۆیان زیاد بکه‌ن. له‌م نێوانه‌شدا کورده‌کانی سووریا که‌ تا نزیکی پێته‌ختی داعش پێشڕه‌وییان کردووه‌ تۆمه‌تی ئه‌وه‌یان له‌سه‌ره‌ که‌ مافی که‌مینه‌ ئایینی و ئیتنیکییه‌کان پێشێل ده‌که‌ن. به‌م حاڵه‌شه‌وه‌ سه‌رکرده‌ کورده‌کانی سووریا به‌ توندی ئه‌و تۆمه‌تانه‌ ڕه‌تده‌که‌نه‌وه‌ و پێیان وایه‌ به‌گوێره‌ی نیزامی فیدڕاڵی که‌ خۆیان پێکیانهێناوه‌ نوێنه‌ری ئیتنیک و ئایینه‌کان له‌ ئیداره‌ی ناوچه‌ی ژێر کۆنتڕۆڵی کورده‌کاندا به‌شدارن.
فابریس باڵانشه‌، توێژه‌ری پرسی کورده‌کان له‌مدواییه‌دا ڕاپۆرتێکی له‌ سایتی ئه‌نیستیتۆی واشنتۆن بڵاو کردووه‌ته‌وه‌ و ئیدعای کردووه‌ کورده‌کانی سووریا دیکه‌ی ئیتنیکه‌کان ناچار ده‌که‌ن له‌ قوتابخانه‌کاندا به‌ زمانی کوردی بخوێنن.
ئه‌م توێژه‌ره‌ له‌ ده‌سته‌واژه‌ی Kurdification یان کوردسازی بۆ وه‌سف کردنی پڕۆسه‌ی سه‌پاندنی زمان و فه‌رهه‌نگی کوردی به‌ سه‌ر دیکه‌ی ئیتنیکه‌کان له‌ قوتابخانه‌کانی باکووری سووریا که‌ڵک وه‌رده‌گرێت.
ئه‌و ده‌سته‌واژه‌یه‌ له‌ به‌رانبه‌ر ده‌سته‌واژه‌ی "ته‌عریب"دا به‌کارهێنراوه‌ و ده‌یه‌وێت بڵێت کورده‌کان به‌نیازن زمان و فه‌رهه‌نگی ئه‌و ناوچه‌یه‌ یه‌کده‌ست بکه‌نه‌وه‌ و ئاسه‌واری فه‌رهه‌نگی و زمانی دیکه‌ی ئیتنیکه‌کان له‌م ناوچانه‌دا بسڕنه‌وه‌. ئه‌م لێکۆڵه‌ره‌ بۆ نموونه‌ ده‌ڵێت: کورده‌کانی سووریا چیتر له‌ ده‌سته‌واژه‌ی قامیشلی (شارێک هه‌ڵکه‌وتوو له‌ باکووری سووریا) که‌ڵک وه‌رناگرن و ده‌سته‌واژه‌ی قامیشلۆ له‌ جێگای قامیشلی به‌کارده‌هێنن.
به‌ڵام سیهانۆک دێبۆ، ڕاوێژکاری باڵای سه‌رکرده‌کانی حزبی یه‌کێتیی دیموکراتیکی کوردی سووریا ئه‌و تۆمه‌ته‌ ڕه‌تده‌کاته‌وه‌ و له‌وباره‌وه‌ به‌ ئارانیووز ده‌ڵێت: سیاسه‌تی سه‌پاندنی زمان و فه‌رهه‌نگی کوردی به‌سه‌ر دیکه‌ی ئیتنیکه‌کاندا هیچ بنه‌مایێکی نییه‌ و درۆیه‌.
ناوبراو زیادی کردووه‌: کاتی واژۆکردنی گرێبه‌ستی کۆمه‌ڵایه‌تی که‌ ساڵی ڕابردوو له‌ نێوان سه‌رجه‌م پێکهاته‌ و ئه‌نجومه‌نه‌کانی باکووری سووریا واژۆ کرا هه‌موو نوێنه‌ره‌کانی ئیتنیک و ئایینه‌کانی باکووری سووریا له‌و گرێبه‌سته‌دا به‌شداربوون و به‌رنامه‌کانی خۆیانیان به‌ تێروته‌سه‌لی باس کردووه‌. به‌رنامه‌ی خوێندن به‌ سێ زمانی کوردی، عه‌ره‌بی و ئاشووری ئاراسته‌ ده‌کرێت و هه‌موو تاکێک مافی ئه‌وه‌ی ده‌بێت جگه‌ له‌ خوێندن و نووسین به‌ زمانی دایکی زمانی دووهه‌میش هه‌ڵبژێرێت. ئه‌مه‌ش ئالییه‌تێکه‌ هه‌مووان له‌سه‌ری ڕێککه‌وتوون.
ڕۆژنامه‌وانێکی دیکه‌ به‌ ناوی جان میرۆ ده‌ڵێت: عه‌ره‌ب و ئاشوورییه‌کان ناچار نین به‌ زمانی کوردی بخوێنن به‌ڵام کورده‌کان به‌ فه‌رمانی به‌رپرسه‌ خۆجێیه‌کان مافی ئه‌وه‌یان نییه‌ له‌ قوتابخانه‌ی مه‌سیحییه‌کاندا بخوێنن.
16 دامه‌زراوی سه‌ر به‌ ئه‌رمه‌نی و عه‌ره‌به‌کانی سووریا نۆڤێمبێری 2015 له‌ به‌یاننامه‌یێکی هاوبه‌شدا دژایه‌تیی خۆیان له‌گه‌ڵ هه‌موو چه‌شنه‌ ده‌ستێوه‌ردانێکی به‌رپرسانی کوردی سووریا له‌ قوتابخانه‌کانی که‌رتی تایبه‌تی سه‌ر به‌و دوو که‌مینه‌یه‌ ڕاگه‌یاند.
 

کۆدی هه‌واڵنێر: 60104

کۆدی بابه‌ت: 73101  |  به‌روار: ۱۳۹۶/۲/۲۵  |  کاتژمێر: 12 : 9

FaceBook   Twitter   Delicious   Digg   Buzz   Google Bookmarks   ˜áæÈ  
ناردنی بۆچوون
ناو و شۆره‌ت:
ئیمه‌یل:
بۆچوون:
بۆچوونی نێردراو‬
ئیمکانات