بەڕێوەبەری گشتیی مەزرینگەی دارولئێحسان لە گفتوگۆ لە گەڵ کوردپرێس شی‌کردەوە:
بارودۆخی ڕاگرتن و چاوەدێری بەسەر منداڵانی بێ‌سەرپەرەشت لە کۆمەڵەی نیکانی سنە
بەشی ئێران/ کوردستان- بەڕێوەبەری گشتیی مەزرینگەی دارولئێحسان وێرای ئاماژە بە ئاگاداری و چاوەدێری بەسەر دەیان منداڵی بێ‌سەرپەرەشت و خراپ‌سەرپەرەشت و خزمەت گەیاندن بە کچانی نابینا و کەمبین لە لایەن ئەم مەزرینگەوە وتی: بەمزووانە لە پێناو پێشگرتن لە خەسارە کۆمەڵایەتییەکان لەم کۆمەڵە کلینیکی منداڵ و بنەماڵە دەکەینەوە.
به پێی هەواڵی کوردپرێس، ڕۆژی دووشەممەی حەوتەی ڕابردوو، هاوکات لەگەڵ جەژنی پیرۆزی قوربان مەزرینگەی دارولئێحسانی سنه له هەڵمەتێکی خوداویستانه و پڕبایەخ وەک دیکەی مەزرینگەکانی ناوچەکه، به هەوڵ و هاوکاری لێژنەی بەڕێوەبەری، کاربەدەستان و بەتایبەت خەڵکی دیندار و خێرخوازی پارێزگا پاش خونێدنی نوێژی جەژنی پیرۆزی قوربان، دەیان سەر ئاژەڵی زیندوو له شوێنی بینای کۆمەڵگەی نیکان که له ژێر چاوەدێری ئەم مەزرینگەیەیه، قوربانی کران و به سۆز و هاودڵی و یەکترخوازی کاربەدەستانی ئەم مەزرینگه و کۆمەڵگه و ئامادەبووان گۆشتی قوربانییەکه له نێو بنەماڵه بێ‌سەرپەرشتیار و هەژاری سەر ئاستی شار دابەشکرا.
له پەراوێزی ئەم ڕێوڕەسمە خێرخوازییەدا، فەرید عێزەت‌پوور بەڕێوەبەری گشتیی مەزرینگەی دارولئێحسانی سنه له وتووێژ لەگەڵ هەواڵنێری کوردپرێس چالاکییەکانی ئەم ڕێکخراوه خێرخوازییەی شی کردەوه و ڕایگەیاند: مەزرینگەی دارولئێحسان هەرچەند ساڵانێکی دوور و درێژه چالاکی نواندووه بەڵام به فەرمی له ساڵی 1381ی هەتاوی چالاکییەکانی دەست پێکرد و ئەندامەکانی لە خەڵک و خێرخوازە خەمخۆرەکان پێکهاتووە.
عێزەت پوور وتیشی: ئەم ڕێکخراوه به هاوکاری و هەوڵی یەک به یەکی ئەندامان بەڕێوه دەچێت و لێژنەی بەڕێوەبەریش بۆ چاوەدێری و بەرەپێشبردنی هەوڵەکان و بەرپرسایەتییەکەیان برتین لە: فەرید عێزەت پوور، یەحیا پەرتەوی، سەعدی سەجادی، فەرەیدوون عەلاقەبەندان، خالید ئەحەدی نیاز و ئەیووب ئیبراهیمی.
ناوبراو جەختی کردەوه: ئەم ڕێکخراوه چەندین کار به شێوەی هەمیشەیی ڕادەپەڕێنێت که گرینگترینەکەیان کۆمەڵەی نیکانه که خۆی له چەند ناوەنددا دەبینێتەوه و خۆی له ناوەنده سەرەکییەکانی ڕێکخراوه بۆ خزمەتگەیاندن به هەژارانە.
ئەم خێرخوازه سنەییه وێڕای ئاماژه بەوەی که یەکێک له ناوەندەکانی ئەم کۆمەڵه خۆجێییه تەرخان کراوه بۆ ڕاگرتن و چاوەدێری منداڵانی بێ‌سەرپەرشت یان خراپ‌سەرەپەرشت و منداڵانی 6 بۆ 12 و 12 بۆ 18 ساڵی تێدا ڕادەگیرێت و چاوەدێری دەکرێت که له سێ کەرت پێک هاتووه، ڕایگەیاند: لەم کەرتانه هەروەها لقگەلێک بۆ فێرکردن و تواناسازی کچانی نابینا و کەم‌بینا، فێرکردنی کار و تواناسازی بنەماڵه بێ‌سەرپەرشت و چاولەدەست، ناوەندی فێرکردن و ڕاوێژی دەروونناسی منداڵەکان و خوێندکارانی زانکۆیی ژێر داپۆشی، نووستنگه و کتێبخانه، هۆڵی وەرزشی و ... تەرخان کراوه و له سەر دەستی کاربەدەستانی ئەم ڕێکخراوه بەڕێوه دەچێت و هەموو منداڵان له کچ و کوڕی، لە خزمەتگەیێنەریی ئاسوودەیی، فێرکاری، سەرگەرمی و چاوەدێری کردن بە کوالیتیی گونجاوەوە بەهرەمەندن.
بەڕێوەبەری گشتیی ڕێکخراوی مەزرینگەی دارولئێحسان له درێژەدا وتیشی: لەم ناوەندەدا پتر له 55 منداڵی بێ‌سەرپەرشت و خراپ‌سەرپەرشت و تەواو هەژار له سەرەتای خوێندنیانەوە لە ژێر داپۆشی بوون و قۆناغه جیاوازەکانیان بڕیوه و چەندین کەسیان چوونەته زانکۆ و هەموو بواری پەروەرده کردن و تەندروستی و هاتووچۆیان بۆ بێ‌بەرامبەره.
عێزەت‌پوور وتیشی: چەندین قوتابی و خوێندکاری زانکۆیی دیکەش جگه له کۆمەڵه، له ژێر داپۆشیدان کە هەموو سەر مانگێک به شێوەی یارانەیی بڕە پارەیەکیان وەک تێچووی خوێندن بۆ دەڕژێتە نێو حیسابەکەیان و پتر له 350 بنەماڵەی هەژار یارمەتی بەردەوام و هەمیشەیی وەردەگرن و نزیکەی 150 بنەماڵەش نێوه نێوه وەک تێچووی دەرمان و ناساندن به ناوەندی تەندروستی وەک پزیشکی ددان و ڕادیۆلۆژی و دەرمان و یارمەتی نەختی یارمەتیان دەدرێتێ.
ناوبراو وتیشی: ئەم ڕێکخراوه به هاوکاری لێژنەی بەڕێوەبەری و هاوکاری ئەندامانی خەمخۆر بەردەوام چالاکی دەکات و له لایەن خەڵکی خێرخواز و دینداری ناوچەکەوه پاڵپشتی دەکرێت. بەم زووانه کلینیکی پسپۆڕی منداڵ و بنەماڵه له کۆمەڵگەی نیکان که له بەهاران دایه دەکرێتەوه.
عێزەت پوور وێڕای ئاماژه به خزمەتەکانی ئەم کلینکه که بریتییه له: ڕاوێژ، فێرکاری و گەر پێویست بوو چارەسەری، وتی: ئەم کلینیکه به ئامانجی خزمەت گەیاندن به کەسانی ژێر داپۆشی و هەژار و گەر پێویست بوو کەسانی ئاسایی بەم زووانه دەکرێتەوه و زیاترین ئامانجەکەشی پێشگرتنە له خەساری کۆمەڵایەتی و به بەهرەمەند بوون له پسپۆڕانی پەیوەندیدار به شێوەی بێ‌بەرامبەر خزمەتگوزاری ئاراسته دەکات.

کۆدی بابه‌ت: 63141  |  به‌روار: ۱۳۹۵/۶/۳۰  |  کاتژمێر: 2 : 46

FaceBook   Twitter   Delicious   Digg   Buzz   Google Bookmarks   ˜áæÈ  
ناردنی بۆچوون
ناو و شۆره‌ت:
ئیمه‌یل:
بۆچوون:
بۆچوونی نێردراو‬
ئیمکانات