نوێنه‌ری حکوومه‌تی هه‌رێم، به‌رپرسان و کارناسان بۆ کوردپرێس باسیان کرد:
گرینگایه‌تی که‌رتی گه‌شتیاری له‌ په‌یوه‌ندی نێوان هه‌رێمی کوردستان و ئێران
"هاووڵاتییه‌کی هه‌رێمی کوردستان که‌ به‌ مه‌به‌ستی چاره‌سه‌ری پزیشکی سه‌ردانی ئێرانی کردبوو وتی: پسپۆڕی و لێهاتوویی پزیشکانی ئێران له‌ ناوچه‌که‌ بێ وێنه‌یه‌ و هه‌روه‌ها ئاستی خزمه‌تگوزاری پزیشکی و تێچووی خزمه‌ته‌ پزیشکییه‌کان له‌ ئێران نیوه‌ی وڵاتێک وه‌کوو تورکیایه‌ و به‌هۆی نێزیکی فه‌رهه‌نگ و زمانه‌کانی هه‌ردوولا ئێران باشترین بژارده‌ بۆ سه‌ردانی من بووه‌."
نازم ده‌باغ، نوێنه‌ری حکوومه‌تی هه‌رێمی کوردستان له‌ ئێران به‌ هه‌واڵنێری کوردپرێسی ڕاگه‌یاند: له‌ سه‌فه‌ری حه‌وته‌ی ڕابردووی وه‌فدی هه‌رێمی کوردستان بۆ ئێران، ڕێککه‌وتنێکی باش له‌باره‌ی په‌یوه‌ندییه‌ گه‌شتیارییه‌کان ئه‌نجام درا و ئێمه‌ هیوادارین بتوانین به‌ هاوکارییه‌کی دوو لایه‌نه‌ چه‌ندین کاری باش به‌ مه‌به‌ستی گه‌شه‌ی که‌رتی گه‌شتیاری و پیشه‌ی توریسم ئه‌نجام بده‌ین.
زیادیشی کرد: له‌ کۆنفڕانسی گه‌شتیاری ئێران و هه‌رێمدا ڕامگه‌یاند که‌ بۆ پشتیوانی و پاڵپشتی له‌ سه‌رجه‌م پڕۆژه‌کانی سه‌رمایه‌دانه‌رانی ئێرانی له‌ هه‌رێمی کوردستان و به‌ تایبه‌ت پرسی گه‌شتیار ده‌رمانی ئاماده‌یی ته‌واومان هه‌یه‌.
کۆنفڕانسی گه‌شتیاری شه‌ریکه‌ موسافیربه‌ری و گه‌شتیارییه‌کانی هه‌رێمی کوردستان و شه‌ریکه‌ موسافیربه‌ری و گه‌شتیارییه‌کانی ئێران به‌ ئاماده‌بوونی نازم ده‌باغ نوێنه‌ری حکوومه‌تی هه‌رێمی کوردستان له‌ تاران، مه‌وله‌وی جه‌بار وه‌هاب سه‌رۆکی ڕێکخراوی گه‌شتیاری هه‌رێمی کوردستان و شاندی هاوڕێی، ئیبراهیم پوورفه‌ره‌ج سه‌رۆکی ده‌سته‌ی سه‌رۆکایه‌تی تۆڕه‌ گه‌شتیارییه‌کانی ئێران، ئه‌کبه‌ر غه‌مخوار ئه‌ندامی ده‌سته‌ی سه‌رۆکایه‌تی ئه‌نجومه‌نی سه‌ندیکای نووسینگه‌ی گه‌شتیاری تاران، کازم خولدی نه‌سه‌ب به‌ڕێوه‌به‌ری گشتی نووسینگه‌ی بانگه‌شه‌ و بازاڕدۆزی ڕێکخراوی میراتی فه‌رهه‌نگی و گه‌شتیاری و ژماره‌یه‌ک له‌ شه‌ریکه‌ موسافیربه‌ری و گه‌شتیارییه‌کانی هه‌رێمی کوردستان و ئێران له‌ هۆڵی هۆتیل ئازادی تاران به‌ڕێوه‌چوو.
نازم ده‌باغ زیادیشی کرد: جێگه‌ی خۆشحاڵییه‌ که‌ له‌ نێوان کۆمه‌ڵه‌ی گه‌شتیاری هه‌رێمی کوردستان و کۆماری ئیسلامی ئێران به‌م شێوازه‌ کۆنفڕانسێک له‌م ئاسته‌ به‌ڕێوه‌ده‌چێت. له‌ نێوان ئێران و هه‌رێمی کوردستان په‌یوه‌ندییه‌کی مێژوویی باش هه‌یه‌. له‌گه‌ڵ ئه‌م په‌یوه‌ندییه‌ که‌ ئێمه‌ به‌ درێژایی مێژوو له‌گه‌ڵ یه‌کتر بوومانه‌، سنوورێکی جوگرافیایی هاوبه‌شیشمان له‌گه‌ڵ یه‌کتر هه‌یه‌؛ هه‌روه‌ها ئێمه‌ له‌ ڕووی ڕه‌گه‌ز، فه‌رهه‌نگ، چ نێزیکی کۆمه‌ڵایه‌تی و ته‌نانه‌ت له‌ ڕووی مێژووشه‌وه‌ هاوبه‌شییه‌کی زۆرمان له‌گه‌ڵ یه‌کتر هه‌یه‌.
وتیشی: لێره‌وه‌ ده‌توانین ئاماژه‌ به‌ چه‌ندین خاڵێکی زیاتر بکه‌ین و بۆ وێنه‌ ده‌توانین زیاتر له‌ پرسه‌ گه‌شتیارییه‌کان که‌ڵک وه‌ربگرین؛ به‌ تایبه‌ت له‌ بارودۆخی ئێستا که‌ به‌رۆکی هه‌رێمی کوردستانی گرتووه‌ته‌وه‌ ده‌توانین به‌ یارمه‌تی و هاوکاری دۆستانی کورد و دۆستانی هه‌رێمی کوردستان شانازی بکه‌ین که‌ له‌ هه‌رێمی کوردستان ئاسایش و ئه‌منییه‌تێکی باش جێگیره‌. له‌گه‌ڵ ئه‌م ئه‌منییه‌ته‌ی که‌ له‌ کوردستاندا جێگیر بووه‌ بۆ سه‌رمایه‌دانه‌ریی ئێرانییه‌کان له‌ بواری گه‌شتیاری و ئه‌و خاڵانه‌ی که‌ پێویستمان پێیه‌تی؛ هه‌ل و بارودۆخێکی گونجاو ڕه‌خساوه‌. یه‌کێک له‌م خاڵانه‌، به‌شی سه‌رمایه‌دانه‌ریی و به‌ ڕای من گه‌شتیاری به‌ ڕاستی بارودۆخێکی تایبه‌تی هه‌یه‌‌؛ که‌ ده‌توانین به‌ پشت به‌ستن و متمانه‌ به‌ دۆستانێک وه‌کوو ئێوه‌ به‌ ڕاستی په‌ره‌ی پێبده‌ین.
نوێنه‌ری حکوومه‌تی هه‌رێمی کوردستان له‌ تاران له‌ درێژه‌دا جه‌ختی کرد: هه‌روا که‌ دۆست و هاوکاری ئێمه‌ جه‌نابی مه‌وله‌وی جه‌بار وه‌هاب له‌م کۆنفڕانسه‌ ئاماژه‌یان کرد، هه‌رێمی کوردستان ئاماده‌یی هه‌یه‌ بۆ ئه‌وه‌ی که‌ پاڵپشتی له‌م پڕۆه‌ژه‌یه‌ بکات؛ ئه‌مه‌ نه‌ ته‌نیا له‌ به‌رژه‌وه‌ندی هه‌رێمی کوردستان به‌ڵکوو له‌ به‌رژه‌وه‌ندی هه‌ردوو لایه‌ن ده‌بێت و به‌ شێوه‌ی گشتی له‌ به‌رژه‌وه‌ندی مرۆڤه‌ که‌ له‌ ژیانی ئه‌مڕۆ پێویست به‌ گه‌شت و سه‌یران و گه‌شتیاری به‌ باشی هه‌ست ده‌کرێت و پرسێکی دیکه‌ که‌ ئه‌مڕۆ زه‌رووری دێته‌ به‌رچاو گه‌شتیارده‌رمانی، گه‌شت و سه‌یران و دیکه‌ی بابه‌ته‌‌کانی له‌م جۆره‌یه‌.
زیادیشی کرد: خاڵێکی دیکه‌ که‌ لێره‌دا ده‌بێ له‌سه‌ری جه‌خت بکه‌ین، له‌ هه‌رێمی کوردستان ئێمه‌ بارودۆخێکمان ڕه‌خساندووه‌ و پرسی ڤیزا به‌ تایبه‌ت بۆ ئێرانییه‌کان نییه‌؛ له‌و ڕووه‌وه‌ هه‌ر ئێرانییه‌ک که‌ پێویست بێ سه‌ردانی هه‌رێمی کوردستان بکات چ له‌ ڕێگای زه‌وینی و چ له‌ ڕێگای ئاسمانی بێته‌ ناو سنووری هه‌رێمی کوردستان؛ به‌ شێوه‌ی ئازادانه‌ ئیزنی ده‌ده‌ن که‌ بێته‌ ناو هه‌رێمی کوردستان و ده‌توانێت که‌ له‌ هه‌رێمی کوردستان بمێنێته‌وه‌ بێ ڤیزا.
نازم ده‌باغ به‌ ئاماژه‌ به‌ بابه‌تی ڤیزای هاووڵاتیانی هه‌رێمی کوردستان وتی: لێره‌دا ئه‌و داخوازییه‌ی که‌ هه‌مانه‌ و له‌ چه‌ندین به‌رنامه‌ی دیکه‌شدا ئه‌م مه‌سه‌له‌مان ئاراسته‌ کردووه‌ ئه‌وه‌یه‌؛ داوا له‌ کۆماری ئیسلامی ئێران ده‌که‌ین که‌ بارودۆخ و که‌شێک بۆ گه‌شتیاری و ئاسانکاری له‌ سه‌فه‌ری خه‌ڵکی هه‌رێمی کوردستان بۆ ئێران و به‌ تایبه‌ت نه‌هێشتنی ڤیزا بڕه‌خسێنێت بۆ ئه‌وه‌ی هاووڵاتیانی هه‌رێمی کوردستان به‌ ئاسانی سه‌ردانی کۆماری ئیسلامی ئێران بکه‌ن.
ناوبراو له‌ کۆتاییدا له‌باره‌ی پرسی توریسم ده‌رمانی ڕایگه‌یاند: چه‌ندین شه‌ریکه‌ له‌ ئێران و له‌ هه‌رێم سه‌رقاڵی ئه‌م کاره‌ن و به‌ شێوه‌ی به‌رده‌وام په‌یوه‌ندییان له‌گه‌ڵ نه‌خۆشخانه و ناوه‌نده‌ ده‌رمانییه‌کانی ئێران هه‌یه‌ و نه‌خۆشه‌کان ده‌گوازنه‌وه‌ بۆ ئه‌م ناوه‌نده‌ ده‌رمانیانه‌ چ له‌ ناوچه‌ کوردنشینه‌کان و چ له‌ تاران، به‌ڵام کاری تڕانزیت و بابه‌تی توریسم ده‌رمانی زیاتر به‌ شێوه‌ی تاکه‌که‌سی و ئازادانه‌ ئه‌نجام ده‌بێت و چاودێرییه‌کی پێویست له‌سه‌ر ئه‌م بابه‌ته‌ ئه‌نجام نادرێت. ئێمه‌ هیوادارین له‌مباره‌وه‌ به‌رپرسانی هه‌ردوولا هه‌رچی زووتر بتوانن ڕێوشوێنه‌ گونجاوه‌کان بگرنه‌به‌ر بۆ ئه‌وه‌ی به‌ شێوه‌ی باشتر و شایسته‌تر هاووڵاتیانی هه‌رێم له‌ ناوه‌نده‌ پزیشکی و پسپۆڕییه‌کانی ئێران که‌ڵک وه‌ربگرن.
شیاوی ئاماژه‌یه‌؛ ڕێژه‌ی ئاڵوگۆڕی بازرگانی و ئابووری ئێران و هه‌رێمی کوردستان له‌ چه‌ند ساڵی ڕابردوودا ڕێژه‌یه‌کی به‌رچاو بووه‌ و هه‌ر ساڵه‌ ئه‌م ڕێژه‌ ئابوورییه‌ به‌رز ده‌بێته‌وه‌.
له‌ تۆکمه‌ بوونه‌وه‌ی په‌یوه‌ندییه‌کاندا، بابه‌تی توریسم و به‌ تایبه‌ت توریسم ده‌رمانی گرینگایه‌تییه‌کی زۆری هه‌یه‌. به‌پێی ئاماره‌کان، هه‌ر ڕۆژه‌ به‌ شێوه‌ی مامناوه‌ندی 500 که‌س به‌ مه‌به‌ستی وه‌رگرتنی ڤیزا سه‌ردانی کۆنسوڵخانه‌ی ئێران له‌ سلێمانی و هه‌ولێر ده‌که‌ن، که‌ له‌ وه‌رزه‌کانی به‌هار و هاویندا ئه‌م ڕێژه‌ ده‌گاته‌ 1000 که‌س. له‌م ئاماره 70 له‌سه‌دیان ڤیزای پزیشکی وه‌رده‌گرن که‌ ئه‌م که‌سانه‌ له‌ ڕێگای سنووری زه‌وینی مه‌ریوان- پیرانشار و خوسره‌وی یان له‌ ڕێگای گه‌شتی ئاسمانی هه‌ولێر- تاران یان سلێمانی- تاران دێنه‌ ئێران.
له‌مباره‌وه‌ دوکتۆر په‌ناهی به‌رپرس و ده‌بیری کۆمیته‌ی ته‌ندروستی و کاروباری گه‌شتیار ده‌رمانی ڕێکخراوی گه‌شتیاری ئێران به‌ هه‌واڵنێری کوردپرێسی ڕاگه‌یاند: هه‌ر ساڵه‌ گه‌شتیارێکی زۆر له‌ عێراقه‌وه‌ سه‌ردانی ئێران ده‌که‌ن که‌ ڕێژه‌یه‌کی به‌رچاو له‌م گه‌شتیارانه‌ به‌ مه‌به‌ستی چاره‌سه‌ری پزیشکی سه‌ردانی ئێران ده‌که‌ن و نێزیک به‌ 20 له‌سه‌دی ئه‌م ڕێژه‌یه‌ش له‌ ڕێگای سنووره‌کانی هه‌رێمی کوردستانه‌وه‌ دێنه ناو‌ ئێران.
دوکتۆر په‌ناهی بازاڕی مه‌به‌ستی به‌ بابه‌تێکی به‌ربڵاو وه‌سف کرد و ڕایگه‌یاند: له‌ کۆنگره‌یه‌کدا که‌ له‌ مانگی به‌فرانباری ساڵی ڕابردوو له‌ خووزستان له‌ ژێر ناوی گه‌شتیار ده‌رمانی له‌ ڕۆژئاوا و باشووری ڕۆژئاوای ئێران به‌ڕێوه‌چوو ڕێوشوێنێک گیراوه‌ته‌به‌ر که‌ هاتن و چۆنیه‌تی کاروباری پزیشکی ئاسانتر کردووه‌ته‌وه‌ و بازاڕی مه‌به‌ستی تا سێ میلیۆن که‌س له‌ به‌رچاو گرتووه‌.
زیادیشی کرد: ڕۆژی 14ی مانگی به‌فرانباری ساڵی ڕابردووش گه‌شتی ئاسمانی تاران- سلێمانی که‌ ماوه‌یه‌ک بوو ڕاوه‌ستابوو له‌لایه‌ن ئه‌وان و به‌ نوێنه‌رایه‌تی له‌ جه‌نابی ڕه‌حمانی جێگری گه‌شتیاری ئه‌م ڕێکخراوه‌ کرایه‌وه‌.
هه‌روه‌ها له‌مباره‌وه‌ جه‌نابی تالبی کارناسی باڵای بواری ته‌ندروستی له‌باره‌ی ئه‌وه‌ی که‌ ئه‌م ڕێکخراوانه‌ کاری تڕانزیتی موسافیران له‌ بابه‌تی گه‌شتیار ده‌رمانی ئه‌نجام ده‌ده‌ن وتی: تا ئێستا هیچ مۆڵه‌تێکی فه‌رمی ده‌رنه‌کراوه‌ و ئه‌مه‌ له‌ به‌رنامه‌ی کاری شۆرای "تامین"دا دانراوه‌ بۆ ئه‌وه‌ی تاوتوێ بکرێت.
ناوبراو هه‌روه‌ها ئاماژه‌ی دا به‌ داواکارییه‌ به‌رفراوانه‌کان له‌ بواری تۆمارکردنی ئه‌م جۆره‌ شه‌ریکانه‌.
بابه‌تی (موسافیر- ده‌رمان) گرینگایه‌تییه‌کی زۆری هه‌یه‌. به‌هۆی ئه‌وه‌ی که‌ ئه‌م کاره‌ و هاتن و چوونه‌ده‌ره‌وه‌ی ئه‌و که‌سانه‌ی که‌ کاری پزیشکیان هه‌یه‌ هێشتا داموده‌زگایه‌کی په‌یوه‌ندیداری بۆ دانراوه‌، باشتره‌ بۆ ئه‌م کاره‌ ڕێوشوێنێکی گونجاو بگیردرێته‌به‌ر و ئه‌م کاره‌ جگه‌ له‌وه‌ی که‌ پاره‌یه‌کی زۆری تێدایه‌ ڕێگایه‌کی به‌ قازانجی بێ تێچووه‌ که‌ ده‌توانێت یارمه‌تی بداته‌ گه‌شه‌ی ئابووری. به‌م حاڵه‌شه‌وه‌ ئه‌گه‌ر ناوچه‌ کوردنشینه‌کانی ئێران له‌ ڕووی که‌ره‌سته‌ پزیشکی و پسپۆڕییه‌کانه‌وه‌ له‌ بارودۆخێکی باشتردا بن ده‌توانن ڕێژه‌یه‌ک له‌م دراوه‌ بۆ خۆیان ته‌رخان بده‌ن و یارمه‌تی بگه‌یێنه‌ گه‌شه‌ی هه‌رچی زیاتری ئه‌م ناوچانه‌.
له‌مباره‌وه‌ خانمی نامجوو به‌ڕێوه‌به‌ری کلینیکی پسپۆڕی چاوپزیشکی به‌سیر به‌ هه‌واڵنێری کوردپرێس وتی: له‌ ساڵدا به‌ شێوه‌ی مامناوه‌ندی نێزیک به‌ 200 تا 250 که‌س له‌ هه‌رێمی کوردستان به‌ مه‌به‌ستی سه‌ردانی چاوپزیشک سه‌ردانی ئه‌م کلینیکه‌ ده‌که‌ن که‌ زۆربه‌یان به‌هۆی کێشه‌ی شه‌به‌کیه‌ و ئاومرواری چاره‌سه‌ری پزیشکییان بۆ ئه‌نجام ده‌درێت. هه‌ر بۆیه‌ ئێمه‌ هیوادارین ڕێکارێکی گونجاو دابنرێت بۆ ئه‌وه‌ی بتوانین خزمه‌تگوزارییه‌کی پزیشکی زیاتر به‌ هاووڵاتیانی هه‌رێمی کوردستان ئاراسته‌ بکه‌ین.
هاوپه‌یوه‌ند به‌م بابه‌ته‌ هاووڵاتییه‌کی هه‌رێمی کوردستان که‌ به‌ مه‌به‌ستی چاره‌سه‌ری پزیشکی سه‌ردانی ئێرانی کردووه‌ وتی: پسپۆڕی و لێهاتوویی پزیشکانی ئێران له‌ ناوچه‌که‌ بێ وێنه‌یه‌ و هه‌روه‌ها ئاستی خزمه‌تگوزاری پزیشکی و تێچووی خزمه‌ته‌ پزیشکییه‌کان له‌ ئێران نیوه‌ی وڵاتێک وه‌کوو تورکیایه‌ و به‌هۆی نێزیکی فه‌رهه‌نگ و زمانه‌کانی هه‌ردوولا ئێران باشترین بژارده‌ بۆ سه‌ردانی من بووه‌.
 

کۆدی بابه‌ت: 42384  |  به‌روار: ۱۳۹۴/۲/۲۱  |  کاتژمێر: 10 : 3

FaceBook   Twitter   Delicious   Digg   Buzz   Google Bookmarks   ˜áæÈ  
ناردنی بۆچوون
ناو و شۆره‌ت:
ئیمه‌یل:
بۆچوون:
بۆچوونی نێردراو‬
ئیمکانات