به‌پێی هه‌واڵی کوردپرێس، سه‌رچاوه‌یه‌کی نێزیک له‌ نووری مالیکی که‌ ناوی ئاشکرا نه‌بووه‌ به‌ شه‌فه‌ق نیووزی ڕاگه‌یاند: مالیکی ده‌یه‌وێ ئه‌و فه‌رمانده‌ له‌شکه‌رییانه‌ی که‌ به‌هۆی که‌مته‌رخه‌می ئه‌وانه‌وه‌ توندوتیژیی و کرده‌وه‌ی تیرۆریستی له‌ عێراق په‌ره‌ی سه‌ندووه‌ سزا بدات.

سه‌رچاوه‌یه‌کی ئه‌منیش له‌ عێراق ئاشکرایکرد که‌ لێکۆڵینه‌وه‌ی سه‌ره‌تایی سه‌باره‌ت به‌ ته‌قینه‌وه‌کانی ئه‌مڕۆی شاری به‌غدا و چه‌ندین شاری باشووری عێراق نیشان ده‌دات که‌ بۆمبه‌کان له‌ ده‌وروبه‌ری ئه‌و ناوچانه‌ چێکراون که‌ ته‌قینه‌وه‌کان تێیدا ڕوویداوه‌.

ئه‌و سه‌رچاوه‌ زیادیشی کرد، ئه‌مه‌ له‌ حاڵێکدایه‌ که‌ هێزه‌کانی سوات به‌رپرسی پاراستنی ئاسایشی زیاره‌تکاران بوونه‌ و ئه‌وان نه‌یانتوانیوه‌ به‌ باشی ئه‌رکه‌کانیان به‌ڕێوه‌ ببه‌ن.

له‌ ته‌قینه‌وه‌کانی ئه‌مڕۆی عێراقدا زیاتر له‌ 50 که‌س کوژران و 100 که‌سیش بریندار بوون.