به‌پێی هه‌واڵی کوردپرێس؛ حسێن شه‌هرستانی له‌ لێدوانێکدا بۆ ڕۆژنامه‌ی ئه‌لحه‌یات چاپی له‌نده‌ن ڕایگه‌یاند: ئێکسۆن مۆبیل مۆڵه‌تی یه‌ک حه‌وته‌یی خواستووه‌ بۆ ئه‌وه‌ی ئه‌و گرێبه‌ستانه‌ی له‌گه‌ڵ هه‌رێمی کوردستان واژۆی کردووه‌ یه‌کلایی بکاته‌وه‌.

وتیشی: حکوومه‌تی ناوه‌ندی عێراق چه‌ندین جار به‌ شێوه‌ی ڕاسته‌وخۆ به‌ کۆمپانیای ئێکسۆن مۆبیلی ڕاگه‌یاندووه‌ که‌ له‌ بواری ده‌رهێنان و وه‌به‌رهێنانی نه‌وتدا به‌بێ وه‌رگرتنی مۆڵه‌ت له‌ ده‌وڵه‌تی به‌‌غدا، بۆیان نییه‌ له‌ خاکی ئه‌م وڵاته‌دا کار بکه‌ن.

شه‌هرستانی زیادی کرد: ئێکسۆن مۆبیل ناچاره‌ به‌ زووترین کات به‌ گرێبه‌سته‌کانی له‌گه‌ڵ حکوومه‌تی هه‌رێمدا بچێته‌وه‌ و ڕاده‌ستی حکوومه‌تی ناوه‌ندی عێراقیان بکات بۆ ئه‌وه‌ی پشکنینیان له‌سه‌ر ئه‌نجام بدرێت.

ئاماژه‌شی به‌وه‌شکرد که‌ له‌ چوارچێوه‌ی ئه‌و گرێبه‌ستانه‌ی‌ له‌ نێوان حکوومه‌تی هه‌رێم و کۆمپانیای ئێکسۆن مۆبیلدا واژۆ کراوه‌ ئه‌و کۆمپانیا ده‌توانێت له‌ سنووری ناوچه‌ جێناکۆکه‌کانی نه‌ینه‌وا و که‌رکووکیشدا نه‌وت بدۆزێته‌وه‌ که‌ به‌ وته‌ی ئه‌و ئه‌مه‌ پێشێل کردنی یاسای عێراقه‌.

جێگری سه‌رۆک وه‌زیران بۆ کاروباری وزه‌ هه‌ڕه‌شه‌ی ئه‌وه‌شی کرد که‌ ئه‌گه‌ر بێتو  له‌ ماوه‌ی چه‌ند ڕۆژی داهاتوودا ئێکسۆن مۆبیل هه‌ڵویستی خۆی له‌گه‌ڵ هه‌رێم یه‌کلایی نه‌کاته‌وه‌ ئه‌وا حکوومه‌تی ناوه‌ندی ڕێ و شوێنی پێویست ده‌گرێته‌به‌ر.