بەرپرسی میراتی فەرهەنگی کوردستان:
دەف و دەف ژەنیی کوردستان تۆماری نەتەوەیی کرا

بەشی فەرهەنگ و هونەر- دەف و شێوەی دەف ژەنی لە پارێزگای کوردستان چووە ڕیزی ئاسەوارە نەتەوەییە مەعنەوییەکانی وڵاتی ئێران.

بە پێی هەواڵی کوردپرێس، بەرپرسی میراتی فەرهەنگی، پیشە دەستیەکان و گەشتیاری پارێزگای کوردستان ڕایگەیاند: لە کۆبوونەوەیەک کە لە ڕێکەوتی 22ی ڕەشەمەی ئەمساڵی هەتاوی لە ڕێکخراوی میراتی فەرهەنگی وڵات و بە ئامادەبوونی محەمەد حەسەن تالبیان جێگری میراتی فەرهەنگی وڵات، فەرهاد نەزەری بەرپرسی گشتیی تۆماری ئاسەواری ڕێکخراوەکە و چەند مامۆستا و دەنگدەری میراتی فەرهەنگی وڵات و نوێنەرانی ١٠ پارێزگا و هەروەها مامۆستایان و کەسایەتییە ناسراوەکانی بواری فەرهەنگ و هونەری کوردستان لەوانە دوکتۆر موختار هاشمی، دوکتۆر حەمید ئەردەڵان و دوکتۆر مەجید شاوەیسی بەڕێوەچوو؛ دەف و دەفژەنیی کوردستان تۆماری نەتەوەیی کرا.
سەید موحسن عەلەوی وێرای نرخاندنی پێگەی ئەم ئاسەوارە لە ڕیزی ئاسەوارە نەتەوەییەکاندا، وتیشی: کوردستان لە ڕابردووی دوورەوە تا ئێستا وەکوو یەکێک لە پارێزگا و ناوچە بەنرخەکان لە بواری دروست کردن و دەف ژەنیەوە هاتۆتە ئەژمار و هەر بەم بۆنەوە ئەمڕۆش ئەو ئامێرە عیرفانییە لە نێوان خەڵکی ئەم ناوچەیە پلە و پێگەی تایبەتی خۆی هەیە.
بەرپرسی گشتیی میراتی فەرهەنگی، پیشەی دەستی و گەشتیاریی پارێزگای کوردستان لە درێژەدا وتی: سنە شوێنی سەرەکی دەف ژەنی لە وڵات و تەنانەت لە تەواوی جیهانە. هیوادارین بەم کارەوە شایەدی گەشە و پەرەپێدانی شێوەی دەف ژەنی و دروست کردنی لە کوردستاندا بین و لەوەبەدوا بەهایەکی زیاتری پێ‌بدرێت.
 
کۆدی هه‌واڵنێر: 60106